काठमाडौं– मलेसिया भ्रमणमा रहेको नेपाल वैदेशिक रोजगार संघको प्रतिनिधिमण्डलले त्यहाँका उद्योगी तथा व्यवसायीका संघसंस्थाहरुसँग भएको भेटमा आपसी सम्बन्ध विस्तार एवं रोजगारसम्बन्धी अप्ठेराहरु फुकाउने सन्दर्भमा बृहत् छलफल गरेको छ । नेपाली वैदेशिक रोजगार व्यवसायी र मलेसियन वैदेशिक रोजगार व्यवसायीबीचको द्विपक्षीय सम्बन्ध सुदृढ गर्न र नेपालबाट मलेसिया कामदार ल्याउने सिलसिलामा देखिएका समस्या तथा अप्ठेराहरु हल गर्ने सम्बन्धमा छलफल भएको बताइएको छ ।
पछिल्लो समय संघको प्रतिनिधिमण्डलले मलेसियाको सेक्युरिटी गार्डहरुको प्रतिष्ठित संस्था परसातुयन इण्डस्ट्री केसेलामातन मलेसिया (पिआइकेएम)सँग नेपाली कामदार भर्तीसम्बन्धी अन्तरक्रिया गरेको छ । मलेसियामा रोजगारदाता र कामदारबीच समन्वयकारी भूमिका निर्वाह गर्दै आएको पिआइकेएमसँग विभिन्न शीर्षकमा केन्द्रित भएर छलफल गरेको संघका महासचिव मेघनाथ भुर्तेलले जानकारी दिए ।
दुई संस्थाबीच कामदार भर्तीका सम्बन्धमा समान धारणा बनाउने, मलेसियामा दर्ता नभएका एजेन्टहरुलाई निरुत्साहित गराउन पिआइकेएमले प्रभावकारी भूमिका खेल्ने, एजेन्सीमार्फत भर्ती भएका कामदारहरूको कल्याणका लागि जिम्मेवारी बहन गर्न तयार हुने विषयमा छलफल भएको छ ।
त्यस्तै संस्थागत रुपमा एकअर्काको फोरमको पहिचान र सदस्यहरूबीचको सम्बन्ध सुदृढ गर्ने, सम्बन्धित सरकारहरूसँग सम्पर्क तथा समन्वयका लागि आपसी सहयोग गर्ने, कुनै पनि पोस्टमा भर्ती हुने कामदारहरुको समस्या समाधानका लागि एकअर्कालाई समर्थन गर्ने विषयमा पनि छलफल केन्द्रित भएको महासिचव भुर्तेलले जानकारी दिए ।
यसैगरी संघ र पिअइकेएमबीच सम्बन्ध तथा संवाद विस्तारका लागि सशक्त सञ्चार च्यानल स्थापना गर्ने, कामदार भर्ती प्रक्रियामा हुने सक्ने सिण्डिकेट र गैरकानुनी अभ्यासलाई निषेध गर्ने, नेपालका वैदेशिक रोजगार व्यवसायीले निकट भविष्यमा आयोजना गर्न लागेको रोजगार मेलालाई समर्थन तथा सहयोग गर्ने र कुनै पनि कामदारको मेडिकल ‘अनफिट’का मुद्दालाई सामूहिक रुपमा हल गर्न आवाज उठाउने विषयमा पनि बृहत् छलफल भएको बताइएको छ ।
त्यसैगरी फेडेरेसन अफ मलेसियन म्यानुफ्याक्चरर्स (एफएमएम)सँग पनि छलफलको कार्यतालिका रहे पनि प्राविधिक कारणले कुनै अन्तरक्रिया हुन नसकेको महासचिव भुर्तेलले बताए । तर, एफएमएमले अनौपचारिक संवादका क्रममा कामदार भर्ती प्रक्रियामा संघलाई सहयोग गर्ने र मलेसियामा गर्न लागिएको रोजगार मेलालाई सबै प्रकारको साथसमर्थन रहने जानकारी दिएको उनले बताए ।
यसअघि संघको प्रतिनिधिमण्डलले मलेसियास्थित सि लाइसेन्स होल्डर एसोसियसनसँग पनि रोजगार मेला सञ्चालन, कामदार भर्तीमा विचौलिया निषेध, एकाधिकारको अन्त्यलगायत विभिन्न विषयमा केन्द्रित रहेर छलफल गरेको थियो । त्यस्तै संघले क्वालालाम्पुरस्थित नेपाली दूतावासलाई पनि मागपत्र प्रमाणीकरण, राहदानीको समस्या समाधान र जेलमा रहेका नेपाली कामदारहरुको उद्धारमा सहजीकरण गरिदिनुपर्नेलगायतका विषयमा ध्यानाकर्षण गराएको थियो ।
रोजगारदाता उद्योग व्यवसायी संघसंस्थाहरु सँग भेट गरी प्रत्यक्ष सम्वन्ध स्थापित गर्ने उद्देश्यले संघका अध्यक्ष राजेन्द्र भण्डारीको नेतृत्वमा मलेसिया भ्रमणमा रहेको वैदेशिक रोजगार व्यवसायीहरुको प्रतिनिधिमण्डल शुक्रबार (आज) स्वदेश फर्किने कार्यक्रम रहेको भुर्तेलले जानकारी दिए ।
