काठमाडौं - ‘कूल पुजा विधि’ पुस्तक लोकार्पण भएको छ ।आइतबार बौद्ध काठमाडौँ नयाँबस्तीस्थित छ्योर्तेन टासी तामाङ गुम्बामा उर्गेन धोङाक छ्योइफेल छ्योतेन धार्गेलिङ गोन्पाद्वारा प्रकाशित तामाङको योन्जनवंशको पूजापाठमा आधारित पुजा विधि पुस्तक लोकार्पण गरिएको हो ।
लिसंखुपाखर गाउँपालिका वडा नं २, म्हानेडाँडाका स्व. पद्म बज्र लामाले परिकल्पना तथा संकलन गरिएको सामग्रीलाई उनकै छोरा जीवन योन्जन लामाको संयोजनमा पुस्तकलाई मूर्त रूप दिएको हो । पुस्तकलाई स्व. पद्म बज्र लामा स्वर्गारोहण भएको दुई वर्ष पुगेको पुण्य तिथिमा विमोचन गरिएको हो ।
पुस्तकमा योन्जन थरी तामाङले पितृ पूजा गर्ने (फुई ठाम्बा) विधि र तरिकाको बारेमा उल्लेख गरिएको छ ।कार्यक्रमलाई सम्बोधन गर्दै बागमती प्रदेशकी सांसद माइली तामाङले सम्भोटा लिपिमा रहेको पुस्तकलाई सबैले पढ्न सकिने गरी नेपालीमा अनुवाद गरिएकोमा खुसी व्यक्त गरिन् । उनले यो पुस्तक सम्पूर्ण योन्जन वंशको लागि अति आवश्यक रहेको उल्लेख गरिन् ।
त्यस्तै पुस्तकमाथि टिप्पणी गर्दै राजनीतिज्ञ एवं बौद्ध दर्शनाचार्य सीताराम तामाङले आठौँ शताब्दीमा सबै बोन धर्मका अनुयायी भएका स्वीकारे । ‘नालन्दा विद्यालयमा अध्ययन गरेकाहरूले प्रभावित पारेका हुन्‚’ उनले भने‚ ‘बज्रयान र बोन मिश्रित लामा भएको समाज हो । खासमा मिलारेपा मान्ने रहेछौँ ।’ उनले मिलारेपा दोलखाको जितवीर लामाको वंशज रहेको समेत अनुसन्धानले पत्ता लागेको बताए ।
यसै गरी जापानका लागि पूर्वराजदुत डा. गणेश योन्जनले अहिलेसम्म पुस्तकहरू प्रकाशित भएको बताउँदै योन्जनबंशको कूल पूजा विधि पुस्तकले हाम्रो कूल पूजा गर्नलाई सहज हुने बताए ।यसै गरी पुस्तकका अनुवादक टीका शेर्पाले बौद्ध धर्म अनुष्ठान मात्रै नभई सांस्कृतिक सभ्यता भएको बताए । उनले सम्भोटा नै तामाङ समुदायले लिपिको रूपमा उपयोग गर्नलाई सुझाए ।
योन्जन वंशावलीका अध्यक्ष महेन्द्रजंग तामाङले कुल पूजालाई यो पुस्तक महत्त्वपूर्ण हुने बताए ।कार्यक्रममा लिसंखुपाखर गाउँपालिकाका अध्यक्ष राजु लामा र उपाध्यक्ष मिठुदेवी लामा, लिसंखुपाखर गाउँपालिकाका पूर्व उपाध्यक्ष हेमगंगा मोक्तान, बुद्धोदय माविका प्रधानाध्यापक कृष्णबहादुर श्रेष्ठ, समाजसेवी पुण्य बज्र लामाले पुस्तकको महत्वको बारेमा मन्तव्य राखेका थिए ।
कार्यक्रम गोन्पाका प्रमुख लामा लवाङ घ्याम्छो लामाको अध्यक्षतामा र इन्दिरा योन्जनले सहजीकरण गरेका थिए ।त्यस्तै बुद्ध बचन सूत्र तन्त्रको सागर सार कामधेनु सम मणिमाला (धारणी) सङ्ग्रह नाम विहरतिस्म (धोमाङ सार मन्त्र) नामक पुस्तक सोही दिन विमोचन भएको थियो ।
पुस्तकलाई तामाङ टुल्कु लोब्साङ नामग्याल रिन्पोछेको बाहुलीमा पुस्तक विमोचन भएको हो । तामाङ गुम्बाका अध्यक्ष हरिबहादुर लामाले संकलन गरेको उक्त पुस्तकलाई खेन्पो निमा जाङबो लामा र लामा पेमा ग्याल्पोले सम्पादन गरेका थिए । सोही दिन छ्योर्तेन टासी तामाङ गुम्बामा सुरेश लामाको संयोजकत्वमा १५ सदस्य रहेको युवा समूह गठन गरेको छ ।
