काठमाडौं– दक्षिण कोरिया सरकारले आप्रवासी कामदारलाई उद्योग तथा कृषि क्षेत्रको अलवा अन्य क्षेत्रमा पनि रोजगारीको अवसर दिने भएको छ । गैरव्यावसायिक वैदेशिक कामदारलाई भिसा ई–९ मा परिमार्जन गरी कामदार अभाव भएका अन्य क्षेत्रमा त्यहाँको सरकारले रोजगारीको अवसर दिन लागेको बताइएको छ ।
रोजगार अनुमति प्रणाली (इपिएस)मार्फत कोरिया जाने आप्रवासी कामदारले आइटी, यातायात, होटल, रेस्टुरेण्ट, क्याफे तथा डिपार्टमेन्टल स्टोरमा काम गर्ने अवसर पाउने त्यहाँको सञ्चारमाध्यम द कोरिया हेराल्डले उल्लेख गरेको छ । यसबाट उल्लिखित क्षेत्र तथा व्यवसायमा विदेशी कामदारलाई रोजगारी दिन सक्ने रोजगारदाता उद्योगको रुपमा सूचीकृत गरिने जनाइएको छ ।
आइटी सेवामा आवश्यक पर्ने अदक्ष कामदारका लागि रोजगारदाताहरुले विदेशी कामदार माग गर्न र भिसाका लागि आवेदन दिनसक्ने जनाउँदै विदेशी कामदारले प्लान्ट उद्योगमासमेत रोजगारी पाउनसक्ने बताइएको छ । हाल ई–९ भिसा प्राप्त गरेका विदेशी कामदारले उद्योग, निर्माण, कृषि, पशुपालन तथा मस्त्यपालन र केही सेवा उद्योगमा काम गर्ने अनुमति पाउँदै आएका छन् ।
अहिलेसम्म नेपाली कामदारका लागि कोरियाले उद्योग तथा कृषि क्षेत्रमा मात्र काम गर्ने अनुमति दिँदै आएकोमा अब अन्य क्षेत्र खुला गरेसँगै कामदार अभाव भएका क्षेत्रमा कानुनी रुपमा नै रोजगारीको अवसर प्राप्त गर्नेछन् । जसअन्तर्गत ई–९ भिसा पाएका नेपाली कामदारले रेस्टुरेन्ट, क्याफे, डिपार्टमेन्टल स्टोर, होटल, आइटीजस्ता सेवा क्षेत्रमा काम गर्न सक्नेछन् । ई–९ भिसा अदक्ष विदेशी कामदारलाई जारी गरिने कार्य भिसा हो ।
कोरिया सरकारले श्रमबजारमा हुनसक्ने जनशक्ति अभावलाई सम्बोधन गर्न रोजगार अनुमति क्षेत्र विस्तार गर्ने निर्णय गरेको उक्त समाचारमाध्यमले जनाएको छ । हाल कोरियन मूलका विदेशी नागरिकले एन–२ भिसा जारी गरेर यस्ता क्षेत्रमा काम गर्ने अनुमति पाउँदै आएका छन् । यसैगरी कोरियामा अध्ययन गर्ने विदेशीले डी–२ भिसामा हप्ताको ३० घण्टामात्र आंशिक काम गर्न अनुमति लिएर सेवा क्षेत्रमा काम गर्दै आएको बताइन्छ । कोरियाले पछिल्लोपटक कानुन परिमार्जन गरी आइटी क्षेत्रलाई पनि ई–९ भिसा पाएका कामदारले काम गर्न पाउने उद्योगको रुपमा थपेको छ । कोरियाले अदक्ष कामदारको लागि ई–९ र दक्ष कामदारका लागि ई–७ भिसा जारी गर्दै आएको छ ।
-1752335779.jpg)
