काठमाडौं– वैदेशिक रोजगार विभागले वैदेशिक रोजगार ऐन २०६४ विपरीत कार्य गर्ने इजाजतपत्र प्राप्त दुईवटा म्यानपावर कम्पनीलाई दुई लाख रुपैयाँ जरिवाना गरेको छ । विभागको स्वीकृतिविना सामाजिक सञ्जालमा विज्ञापन गरेका क्यापिटल रिक्रुटमेन्ट सर्भिसेज र इगल म्यानपावर कन्सल्ट्यान्टलाई जरिवाना गरेको हो ।
नेपाली युवाहरुलाई वैदेशिक रोजगारीमा पठाइदिने भन्दै सामाजिक सञ्जालमा विज्ञापन गरी राहदानी एवं आवश्यक कागजात संकलन गर्ने गरेको भन्दै विभागले जरिवाना गरेको जनाएको छ ।विभागले बुधबार एक विज्ञप्ति जारी गर्दै वैदेशिक रोजगार ऐन २०६४ को दफा २१ (३) विपरीत कार्य गर्ने इजाजतपत्र प्राप्त संस्था क्यापिटल रिक्रुटमेन्ट सर्भिसेज र इगल म्यानपावर कन्सल्ट्यान्टलाई जनही दुई लाख रुपैयाँ जरिवाना गरिएको उल्लेख गरेको छ ।
उल्लिखित म्यानपावर कम्पनीहरुलाई विज्ञापन प्रकाशनपूर्व विभागबाट स्वीकृति नलिएका कारण कारबाहीको दायरामा ल्याइएको विभागका निर्देशक एवं सूचना अधिकारी कविराज उप्रेतीले बताए । विभागले म्यानपावर कम्पनीलाई मात्र नभई सामाजिक सञ्जालमा भ्रमपूर्ण विज्ञापन गरेको भन्दै ललितपुस्थित सुयान एजुकेशन प्रालि र एलाइट टु वर्क ह्युमन रिसोर्सेस हस्पिटालिटी एण्ड ट्रेनिङ सेन्टरको स्थलगत अनुगमन गरी थप अनुसन्धान गरिरहेको निर्देशक उप्रेतीले जानकारी दिए ।
विभागले यसअघि वैदेशिक रोजगारीको नाममा सामाजिक सञ्जाल (फेसबुक, इन्स्टाग्राम, टिकटक)मा सूचना तथा विज्ञापन प्रकाशन गरी ठगी गर्ने घटना बढ्दै गएको भन्दै सचेत गराएको थियो । पछिल्लो समय युरोपेली मुलुकमा आकर्षक तलव एवं सेवा सुविधा प्राप्त हुने प्रलोभन देखाई समाजिक सञ्जालमा हुने विज्ञापनको सूक्ष्म अध्ययन गरिरहेको पनि विभागले उल्लेख गरेको थियो ।
ठगी तथा भ्रमपूर्ण सूचनाविरुद्ध कडारुपमा प्रस्तुत भएको विभागले केही दिनअघिमात्रै डि. स्क्वायर ग्रुप र डिलक्स एचआर सोलुसन नामक दुईवटा म्यानपावर कम्पनीको ऐनविपरीत गतिविधि गरेको र पीडितलाई क्षतिपूर्ति नदिएको भन्दै इजाजतपत्र नै रद्द गरेको थियो ।
वैदेशिक रोजगारीका लागि जान इच्छुक नेपालीहरुलाई सामाजिक सञ्जालमा प्रकाशन/प्रसारण हुने भ्रमपूर्ण विज्ञापनमा विश्वास नगर्न पनि विभागले पुनः आग्रह गरेको छ । साथै, प्रचलित ऐन कानुनविपरीत सामाजिक सञ्जालमा सूचना तथा विज्ञापन सम्प्रेषण नगर्न सचेत गराउँदै यदी कसैले त्यस्तो भ्रमपूर्ण सन्देश प्रवाह गरेमा कडा कारबाही गर्ने चेतावनीसमेत विभागले दिएको छ ।
-1745656903.jpeg)