काठमाडौं - वैदेशिक रोजगारीका लागि पोर्चुगल पठाइदिने भन्दै ठगी गरेको आरोपमा प्रहरीले एक जनालाई पक्राउ गरेको छ । पोर्चुगलमा आकर्षक तलबसहितको रोजगारी लगाइदिने भन्दै तीन जनासँग रकम संकलन गरी फरार रहेको आरोपमा उमेश सेती सुरुवाललाई प्रहरीले पक्राउ गरेको हो ।
इलामको रोङ गाउँपालिका–६ स्थायी घर भई हाल काठमाडौं सिनामंगल बस्ने ३१ वर्षीय उमेशले सुरज श्रेष्ठसमेत तीन जनालाई पोर्चुगल जान प्रतिव्यक्ति १३ लाख रुपैयाँ लाग्ने भन्दै पीडितसँग पटक–पटक गरी ३९ लाख रुपैयाँ लिएर ठगी गरेको प्रहरीले जनाएको छ ।
पोर्चुगलको एक प्रतिष्ठित कृषि कम्पनीमा मासिक एक लाख रुपैयाँभन्दा बढी आकर्षक तलब हुने गरी काम लागाइदिने प्रलोभनमा पारी रकम लिएर फरार रहेको अवस्थामा पक्राउ गरिएको प्रहरीले जनाएको छ । उमेशलाई खोजतालासका क्रममा बौद्धबाट पक्राउ गरिएको बताइएको छ ।
उनलाई काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले पक्राउ गरेको बताइएको छ । पीडितबाट पटक–पटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका उनलाई थप अनुसन्धान तथा कारबाहीका लागि विभागमा बुझाइएको प्रहरी उपरीक्षक रविन्द्र रेग्मीले जानकारी दिए ।
