काठमाडौं– रोजगारीका लागि साउदी अरेबिया पुगेर विभिन्न कारणले जरिवानामा परेका नेपाली श्रमिकहरुलाई रियादस्थित नेपाली दूतावासले सहयोग गर्ने भएको छ । दूतावासले एक सूचना जारी गर्दै साउदी रोजगारीको शिलशिलामा जरिवाना लागेका नेपाली नागरिकलाई स्वदेश फिर्तीको लागि सहयोग गर्ने भएको हो ।
साउदीमा रहँदा विभिन्न कारणले कम्पनी वा कफिल (साहु)ले जरिवाना लगाइदिएकाहरुलाई दूतावासको सम्पर्कमा आउन वा दिइएको वेबसाइटमा यथाशीघ्र आफ्नो विवरण अपडेट गर्न दूतावासले सूचित गराएको छ ।
‘जरिवाना लगाइएका व्यक्तिहरूको विवरण संकलन गरी निजहरूको जरीवाना वा फाइन मिनाहको प्रक्रियालाई मूर्त दिई नेपाल फिर्ता पठाउने विषयमा सम्बन्धित निकायहरूमा छलफल गर्ने प्रयोजनका लागि विवरण अति आवश्यक परेकोले हालसम्म विवरण पेस गर्न छुट भएकाहरूले आफ्नो विवरण अविलम्ब अपडेट गर्न सम्बन्धित सबैमा पुनः अनुरोध गरिन्छ,’ दूतावासद्वारा जारी सूचनामा भनिएको छ ।
दूतावासले आवश्यक जानकारी र सहजीकरणका लागि रियादस्थित दूतावासको कार्यालय र जेद्दास्थित नेपाली महावाणिज्यदूतावासमा बिदाको दिनबाहेक कार्यालय समयभित्र सम्पर्क राख्न सकिने जनाएको छ । यसअघि दूतावासले साउदीका विभिन्न स्थानमा रहेका हुरुब लागेका (कम्पनी छोडेर भागेका) र इकामा (बस्ने अनुमति) नभएका नेपाली श्रमिकहरुलाई आवश्यक प्रक्रिया पूरा गराई बहिर्गमन भिसा (एक्जिट भिसा)मार्फत स्वदेश पठाउँदै आएको छ ।
साउदी अध्यागमनको प्रावधानअनुसार जरिवाना लागेका श्रमिकको हकमा एक्जिट भिसा नपाइने हुँदा त्यस्ता श्रमिकको यकीन तथ्यांक संकलन गरी आवश्यक समन्वयका लागि विवरण माग गरिएको दूतावासले जनाएको छ ।
साउदी अध्यागमनले ल्याएको नयाँ कानुनअनुसार हालसम्म हुरुब लागेका वा इकामा नभएका झण्डै २५ सय नेपाली श्रमिक दूतावासको सहयोगमा ‘एक्जिट’ भिसा प्राप्त गरी स्वदेश फर्किन सफल भएको दूतावासले सार्वजनिक गरेको विवरणमा उल्लेख गरिएको छ ।
