काठमाडौं– वैदेशिक रोजगार विभागले सामाजिक सञ्जालमा आएका वैदेशिक रोजगारसम्बन्धी विज्ञापनहरुको भ्रममा नपर्न आग्रह गरेको छ । विभागले सामाजिक सञ्जालमा आएका युरोपेली मुलुकमा रोजगारी पाइने भन्नेजस्ता भ्रामक विज्ञापनको विश्वास नगर्न आग्रह गरेको हो ।
विभागले शुक्रबार एक विज्ञप्ति जारी गर्दै फेसबुक, इन्स्टाग्राम, टिकटकलगायतका सामाजिक सञ्जालबाट पछिल्लो समय युरोपेली मुलुकमा रोजगारसम्बन्धी विभिन्न विज्ञापनहरू गर्दै ठगी गर्ने क्रम बढेको उल्लेख गरेको छ । विभागले युरोपेली मुलुक रोमानिया, माल्टा, पोर्चुगल, क्रोएसिया, साइप्रस, टर्की, अल्वानिया र क्यानडाजस्ता देशमा वर्किङ भिसामा पठाइदिने भन्दै पछिल्लो समय सामाजिक सञ्जालमार्फत विज्ञापन गर्ने गिरोह सक्रिय रहेकोप्रति सचेत गराएको छ । उल्लिखित देशहरूमा रोजगारीको अवसर भन्दै सरकारसँग अनुमतिविनै विज्ञापन भइरहेकोप्रति विभागको ध्यानाकर्षण भएको जनाएको छ ।
वैदेशिक रोजगार व्यवसाय सञ्चालनका लागि इजाजतपत्र प्राप्त संस्था (म्यानपावर कम्पनी)हरुले प्रचलित कानुनबमोजिम नेपाली नागरिकहरुलाई वैदेशिक रोजगारीमा पठाउनसक्ने व्यवस्था रहेको उल्लेख गर्दै विभागले आधिकारिक निकायको अनुमतिविना सामाजिक सञ्जालमा वैदेशिक रोजगारसम्बन्धी विषयमा प्रचारप्रसार गरी सर्वसाधारणमा भ्रम सिर्जना नगर्न पनि सम्बन्धित सबैलाई सचेत गराएको छ ।
पछिल्लो समय युरोपेली मुलुकमा आकर्षक तलव एवं सेवा–सुविधा प्राप्त हुने प्रलोभन देखाई समाजिक सञ्जालबाट गरिने विज्ञापनमार्फत ठगी गर्ने क्रम बढिरहेको जनाउँदै प्रचलित कानुनविपरीत हुने गतिविधिलाई नियन्त्रण गर्न विभाग सदैव तत्पर रहेको जनाइएको छ । साथै, विभागले त्यस्ता क्रियाकलापमा संलग्नमाथि कारबाहीको चेतावनी दिएको छ । भ्रमपूर्ण विज्ञापनमा भर नपरी वैदेशिक रोजगारीको प्रक्रिया सुरु गर्नुपूर्व आवश्यक सबै प्रक्रिया तथा विषयमा पूर्णरुपमा सम्बन्धित निकायबाट जानकारी लिन पनि विभागले आग्रह गरेको छ ।
विभागले वैदेशिक रोजगारीमा हुने ठगी नियन्त्रण तथा सचेतनाका लागि बेलाबेलामा विज्ञप्ति तथा सूचना जारी गर्दै आए पनि ठगीका घटनामा कमी आएको छैन । केही दिनअघिमात्रै वैदेशिक रोजगारीका लागि युरोपका विभिन्न मुलुक पठाइदिन्छु भन्दै ठगी गरेको आरोपमा प्रहरीले तीन जनालाई पक्राउ गरेर कारबाहीका लागि विभागमा नै बुझाएको छ । पक्राउ पर्नेहरुमा एकमाया पुलामी मगर, सन्दीपकुमार चौधरी, शालिकराम अर्याल रहेका छन् ।
गोरखाको गण्डकी गाउँपालिका–६ घर भई काठमाडौं महानगरपालिका–१५ बस्ने मगरले पोर्चुगल पठाइदिने भन्दै २ लाख ५६ हजार रूपैयाँ, सुनसरीको रामधुनी नगरपालिका–३ घर भई काठमाडौं महानगरपालिका–३२ बस्ने चौधरीले फ्रान्स पठाइदिने भन्दै दुई लाख ५५ हजार रुपैयाँ, धादिङको थाक्रे गाउँपालिका–४ घर भई काठमाडौं कलंकी बस्ने अर्यालले क्रोएसिया पठाइदिने भन्दै ५० हजार रूपैयाँ ठगी गरेको प्रहरीले जनाएको छ । यसरी पक्राउ परेकाहरुबाट पीडितलाई मेलमिलापमार्फत क्षतिपूर्ति दिलाउने र जटिल समस्या भएकाहरुको सम्बन्धमा अदालती प्रक्रियामा जाने गरेको विभागले जनाएको छ ।
-1752335779.jpg)
