काठमाडौं– रोजगारीका लागि अवैधानिक रुपमा विभिन्न एजेण्टमार्फत साउदी अरेबिया पुगेर हिंसामा परेका चार जना नेपाली महिला कामदारको उद्दार गरिएको छ । कुवेतको एक प्रतिष्ठित कम्पनीमा काम लगाइदिने प्रलोभन देखाइ गैरकानुनी रूपमा घरेलु कामका लागि एजेण्टहरुले उनीहरुलाई साउदी पुर्याएको पाइएको छ । त्यहाँ हिंसामा परेका उनीहरुलाई रियादस्थित नेपाली राजदूतावासले उद्दार गरी बुधबार नेपाल फर्काएको छ ।
गैरकानुनी तवरबाट भारतीय हवाईमार्ग प्रयोग गरी कुवेत पुर्याई केही महिना काम गरी त्यहाँको स्थानीय एजेण्टले घरेलु कामदारको रुपमा साउदी अरब पुर्याएका थिए । यसरी साउदी पुगेका महिलाहरुलाई विभिन्न ठाउँबाट तीन महिनाअघि उद्दार गरी दूतावासले खाना र आवास सुविधासहित आफ्नो सेल्टरमा राखेको जनाएको छ ।
उद्दार गरिएका महिलाहरुले लामो समय (केहीले सात वर्षसम्म) साउदीस्थित कफिल (साहु)को घरमा काम गरेका थिए । साउदीको कफिलले उनीहरुलाई भनेबमोजिमको तलब सुविधा नदिएको, बिरामी हुँदा औषधि उपचार नगराएको, दैनिक १८ घण्टासम्म काममा लगाउने गरेको, तलब माग्दा कुटपिट गर्ने गरेको, शारीरिक र मानसिक तनाव दिने गरेको, नेपाल फर्किन नदिएको जस्ता अमानवीय र अभद्र व्यवहार गरेको प्राप्त जानकारीको आधारमा उद्दार गरिएको दूतावासले उल्लेख गरेको छ ।
गम्भीर अवस्थामा रहेका उनीहरुलाई उद्दार गरी दूतावासको अनुरोधमा साउदी सरकारको घरेलु कामदार कार्यालयले आन्तरिक कानुनी प्रक्रिया मिलाई बहिर्गमन (एक्जिट) भिसा प्राप्त भएपछि यही साउन २४ गते हिमालय एयरलाइन्समार्फत नेपाल फिर्ता पठाइएको उल्लेख गरिएको छ ।
यसरी गैरकानुनी रुपमा साउदी अरब ल्याइएका र राजदूतावासले विभिन्न समयमा उद्दार गरी नेपाल फर्काइएका दर्जनौं नेपाली महिला तथा पुरुष कामदारहरुको उद्दार कार्यमा गैरआवासीय नेपाली संघ (एनआरएनए) साउदी अरबले निरन्तर रुपमा सहयोग उपलब्ध गराउँदै आएको दूतावासले जनाएको छ । यसपटक उद्दार गरिएका चारै जना महिलालाई नेपाल फर्कने हवाई टिकटको व्यवस्था साउदीस्थित प्रवासी नेपाली मञ्चले गरेको बताइएको छ ।
दूतावासले समस्यामा परेका नेपाली महिला कामदारहरुको उद्दार तथा स्वदेश फिर्ती कार्यमा नेपाली संघसंस्थाहरुबाट प्राप्त भइरहेको महŒवपूर्ण सहयोगप्रति आभार व्यक्त गर्दै आगामी दिनमा पनि निरन्तरता रहने विश्वास लिएको छ । नेपाल सरकारले घरेलु कामदारका रुपमा महिलाहरुलाई साउदी अरब प्रवेशका लागि रोक लगाए पनि विभिन्न तरिकाले एजेण्ट तथा मानव तस्करहरुले अवैध बाटोबाट पुर्याउने गरेको बताइएको छ । तसर्थः मानव तस्कर तथा एजेण्टको विभिन्न प्रलोभन र आश्वासनमा परी नेपाली महिलाहरु घरेलु कामदारको रुपमा साउदी अरब नआउन दूतावासले सम्बन्धित सबैलाई आग्रहसमेत गरेको छ ।
-1752335779.jpg)
