काठमाडौं– वैदेशिक रोजगारमा जान भारतीय विमानस्थल प्रयोग गर्न भारतका लागि भारतीय राजदूताबासले प्रतिबन्ध लगाएको छ । कतिपय अवस्थामा वैदेशिक रोजगारमा जान नेपालीले भारतीय विमानस्थल प्रयोग गर्दै आएकामा राजदूताबासले प्रेस विज्ञप्ति जारी गर्दै अब भने भारत हुँदै तेस्रो मुलुक जाने काममा प्रतिबन्ध लगाएको हो ।
खासगरी, भारत सरकारले नेपालबाट स्थलमार्ग हुँदै दिल्लीको विमानस्थलबाट विदेश जाने नेपालीलाई रोक लगाउने निर्णय गरेपछि दूताबासले पनि भारतको बाटो भएर नेपालीले वैदेशिक रोजगारमा जान रोक लगाएको छ । भारतस्थित नेपाली राजदूताबासका अनुसार भारतीय बिमानस्थलमार्फत् विदेश जाने नेपाली युवालाई विमानस्थलमै रोक लगाइने भएको छ ।
भारतमा रहेको नेपाली दूताबासले बिज्ञप्ति जारी गर्दै भारतीय बिमानस्थलमार्फत विदेश जाने नेपाली युवालाई विमानस्थलमै रोक लगाइने भएकाले नेपालकै विमानस्थल प्रयोग गर्न सुझाव दिएको छ । यसअघि पनि नेपाल सरकारले वैदेशिक रोजगारमा जानका लागि नेपालकै विमानस्थल प्रयोग गर्नुपर्ने भन्दै आए पनि यसलाई कार्यान्वयनमा ल्याउन सकिएको थिएन । भारतले नचाहेसम्म यस्तो कार्य नरोकिने भएपछि नेपाल सरकारले जतिसुकै प्रयास गरे पनि नेपाली युवाहरूले भारतकै विमानस्थल प्रयोग गरेर वैदेशिक रोजगारमा जाँदै आएका थिए ।
भारत हुँदै तेस्रो मुलुक जानका लागि नेपालको अध्यागमन विभागले छाप लगाएको हुनुपर्ने तर स्थल मार्गबाट जाने नेपालीलाई पासपोर्टमा छाप लगाउने व्यवस्था अध्यागमन विभागले नगरेको भन्दै दूताबासले नेपाली विमानस्थलमार्फत नै गन्तव्यतर्फ जान सुझाव दिएको छ । नेपालको अध्यागमन विभागको छाप नभएको राहदानीबाहक भारतीय बिमानस्थल प्रयोग गरी तेस्रो मुलुक जान नपाउने व्यवस्था रहेको भन्दै समस्याबाट बच्नका लागि त्रिभुवन अन्तर्राष्ट्रिय विमानस्थलकै प्रयोग गर्न दूताबासले विज्ञप्तिमार्फत जानकारी दिएको छ ।
कतिपय युवाहरूले नेपालबाट स्थलमार्ग हुँदै भारत पुग्ने र भारतीय विमानस्थल प्रयोग गरेर वैदेशिक रोजगारमा जाने हुँदा नेपाल सरकारसँग पनि कति नेपाली वैदेशिक रोजगारमा छन् ? भन्ने तथ्यांक देखिएको छैन । अब भने सरकारले वैदेशिक रोजगारमा जाने र आउनेको तथ्यांक नै अध्यागमन विभागले राख्न थालेपछि अब सरकारसँग वैदेशिक रोजगारमा जाने युवाहरूको तथ्यांक हुने सरकारी अधिकारीहरू बताउँछन् ।
भारतले पनि स्थलमार्ग हुँदै भारतबाट वैदेशिक रोजगारमा जानेलाई रोक्ने भएपछि वैदेशिक रोजगारमा जानेको यकिन तथ्यांक उपलब्ध हुने देखिएको छ । श्रम, रोजगार तथा सामाजिक सुरक्षा मन्त्री रामेश्वर राय यादवले केही दिनअघि नेपाल लोकतान्त्रिक वैदेशिक रोजगार व्यवसायी एसोसियसनका नवनिर्वाचित पदाधिकारीहरूसँगको भेटमा वैदेशिक रोजगारमा जाने युवाहरूको तथ्यांक नभएको भन्दै यसलाई व्यवस्थित गर्ने बताएका थिए ।
सोही बेला वदैशिक रोजगारमा जाने युवाहरूको आधिकारिक तथ्यांक नराखिएकोप्रति मन्त्री यादव आक्रोशित भएका थिए । नेपालको जंगलमा जंगली जनावरको यकिन तथ्यांक राखिने तर नागरिकको तथ्यांक नराखिएको भन्दै यसलाई अब व्यवस्थित रूपले अभिलेख राखिने बताएका थिए । युवाहरू विदेश गएको अभिलेख भए पनि फर्केको अभिलेख नभएको भन्दै योभन्दा अर्को अव्यवस्थित हुनै नसक्ने बताउँदै उनले यसबेला आफ्नो नागरिकको बारेमा सरकारले सोधखोज नगरेको भन्दै अब यसको लिखित प्रमाण राखिने बताएका थिए । यहि बमोजिम सरकारले वैदेशिक रोजगारमा जानेहरूको यकिन तथ्यांक पत्ता लगाउन भारतीय विमानस्थल प्रयोग गर्न प्रतिबन्ध लगाएको स्रोत बताउँछ ।
