काठमाडौं- वैदेशिक रोजगारीमा पठाइदिने भन्दै विभिन्न व्यक्तिलाई ठगी गरेको आरोपमा दुई जना पक्राउ परेका छन् । क्यानडा र मलेसियामा आकर्षक तलबसहितको रोजगारी लगाइदिने भन्दै पीडितबाट रकम संकलन गरी फरार रहेको आरोपमा फूलमाया जिरेल र रविन्द्र राईलाई प्रहरीले पक्राउ गरेको हो ।
दोलखाको जिरी नगरपालिका–६ स्थायी घर भई हाल काठमाडौं बूढानीलकण्ठ बस्ने २७ वर्षीया जिरेलले नवराज घिमिरेलाई क्यानडा जान प्रतिव्यक्ति १० लाख रुपैयाँ लाग्ने र त्यहाँ पुगेपछि प्रतिष्ठित होटलमा काम लागाइदिने भन्दै पटक–पटक गरी तीन लाख ७४ हजार रुपैयाँ लिएर ठगी गरेको प्रहरीले जनाएको छ ।
उनले पीडितलाई क्यानडामा एक लाख रुपैयाँभन्दा बढी मासिक तलब हुने भनी विश्वास दिलाई पैसा लिएर सम्पर्कविहीन भएको अवस्थामा पक्राउ गरिएको प्रहरीले जनाएको छ । जिरेललाई खोजतालासका क्रममा मिनभवनबाट पक्राउ गरिएको प्रहरीले जनाएको छ ।
त्यस्तै उदयपुरको ताप्लिङ गाउँपालिका–२ स्थायी घर भई हाल काठमाडौं कुमारीगाल बस्ने ३८ वर्षीय राईले फर्कमान बुढालाई आकर्षक रोजगारीका लागि मलेसिया पठाइदिने भन्दै रकम लिएर ठगी गरेको प्रहरीले जनाएको छ । उनले कति रकम लिएको भन्ने खुल्न बाँकी छ । पीडितलाई विश्वास दिलाइ प्रलोभनमा पारी रकम संकलन गरी सम्पर्कविहीन रहेका राईलाई सामाखुसीबाट पक्राउ गरिएको प्रहरीले जनाएको छ ।
उनीहरु दुवै जनालाई काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले पक्राउ गरेको हो । पीडितबाट पटक–पटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका उनीहरुलाई थप अनुसन्धान तथा कारबाहीको लागि विभागमा बुझाइएको प्रहरी उपरीक्षक मिलन केसीले जानकारी दिए ।
