काठमाडौं– वैदेशिक रोजगार व्यवसायीहरुको पहलमा वैदेशिक रोजगार विभाग परिसरमा मेलमिलाप केन्द्र भवन बन्ने भएको छ । ताहचलस्थित विभागमा मेलमिलाप कार्यकक्षको अभाव भएका कारण व्यवसायीहरुको आर्थिक सहयोगमा दुई कोठे मेलमिलाप केन्द्र भवन बनाउन लगिएको हो ।
विभागले अनुमति दिएपछि सोमबार वैदेशिक रोजगार व्यवसायी संघका अध्यक्ष राजेन्द्र भण्डारीले एक कार्यक्रमबीच भवनको सिलान्यास गरे । बुद्धनगरमा रहेको विभाग ताहाचलमा सरेपछि छुट्टै कार्यकक्ष नहुँदा कार्यसम्पादनमा कठिनाइ आएका कारण भवन निर्माण गर्नुपर्ने अवस्था आएको अध्यक्ष भण्डारीले बताए ।
‘व्यवसायी र कामदारबीच भइपरी आउने समस्या निराकरण तथा मेलमिलापको लागि कार्यकक्ष अभाव भएपछि भवन निर्माणमा व्यवसायीहरुको स्वेच्छिक आर्थिक सहयोग रहनेगरी सिलान्यास गरियो,’ उनले भने, ‘थुप्रै व्यवसायीहरुले भवन निर्माणका लागि सहयोग गर्ने वचन दिनुभएको छ भने झण्डै २०० जति व्यवसायीले सहयोग गरिसक्नुभएको छ ।’ व्यवसायीहरुबाट हुने सहयोगका कारण छिट्टै भवन निर्माण सम्पन्न हुने उनले बताए ।
त्यस्तै संघका महासचिव मेघनाथ भुर्तेलले श्रमिक र व्यवसायीका समस्या सुनुवाइका लागि मेलमिलाप केन्द्र भवन निर्माण गर्न संघले पहल गरेको बताए । कार्यकक्ष अभावका कारण व्यवसायीविरुद्ध विभागमा परेका उजुरीका सम्बन्धमा छलफल तथ सुनुवाइ गर्न कठिनाइ भएका कारण भवन निर्माण गर्नु परेको भुर्तेलले बताए ।
व्यवसायीविरुद्ध पर्ने उजुरीका सम्बन्धमा छलफल तथा मेलमिलापका लागि संघले सचिव कर्णराज कटुवालको संयोजनकत्वमा १८ सदस्यीय समिति गठन गरेको छ । सोही समितिका सदस्यहरुले विभागका अधिकारीहरुसँगको समन्वयमा उजुरीसम्बन्धी आवश्यक परामर्श, छलफल र मेलमिलापको कार्य सम्पादन गर्दै आएको महासचिव भुर्तेलले जानकारी दिए ।
‘हामी सरकारसँग सहकार्य गर्न तयार छौं र श्रमिकहरुसँग पनि सँगै छौं भन्नका लागि हामी आफैंले सहयोग जुटाएर भवन निर्माण गर्न लागेका हौं,’ उनले भने ।विभागले आठ महिनाअघिदेखि वैदेशिक रोजगारीको सिलसिलामा समस्यामा परेका कामदारको गुनासो सुनुवाइका लागि संघसँग समन्वय हुनेगरी मेलमिलाप केन्द्र सञ्चालनमा ल्याएको हो । व्यवसायीविरुद्ध पर्ने अधिकांश उजुरी तथा गुनासोलाई अवस्था हेरी मेलमिलाप गराउने र जटिल अवस्थाका मुद्दाहरुलाई कारबाहीका लागि सिफारिस गर्ने गरिएको भुर्तेलले बताए ।
-1752335779.jpg)
