काठमाडौं- वैदेशिक रोजगार विभागले इजाजतवाला अभिमुखीकरण तालिम प्रदायक संस्थासँग कर्मचारी विवरण माग गरेको छ । विभागले शुक्रबार एक सूचना जारी गर्दै विभागबाट अनुमतिप्राप्त गरी सञ्चालनमा रहेका वैदेशिक रोजगारसम्बन्धी काम गर्न इजाजतवाला यस्ता संस्थाहरुसँग कर्मचारी विवरण माग गरेको हो ।
तालिम प्रदायक संस्थाले तोकिएको मापदण्डअनुसार काम नगरेको गुनासो आएपछि विभागले यस्ता संस्थालाई तालिम सञ्चालन गरिरहेको स्थान र कर्मचारी विवरण माग गरेको विभागका सूचना अधिकारी कविराज उप्रेतीले जानकारी दिए ।उनका अनुसार विभागको नियमित अनुगमन तथा आकस्मिक अनुगमनका क्रममा कतिपय तालिम प्रदायक संस्थाले तालिम सञ्चालन कार्यविधि, २०७६ को दफा ११ (अनुसूची २) मा उल्लेख भएअनुसार तोकिएबमोजिमको केही मापदण्ड पूरा नगरेको पाइएको छ ।
विभागले तालिम प्रदायक संस्थाले यथाशीघ्र कार्यविधिमा तोकिएबमोजिमको मापदण्ड पूरा गर्ने र सम्बन्धित संस्थाले हाल तालिम सञ्चालन गरिरहेको स्थान र कर्मचारी विवरण सात दिनभित्र विभागको अभिमुखीकरण तथा अनुगमन शाखामा बुझाइ अद्यावधिक गर्न आग्रह गरेको छ । विवरण नबुझाए वैदेशिक रोजगार ऐन, २०६४ अनुसार कारबाही हुने विभागद्वारा प्रकाशित सूचनामा उल्लेख गरिएको छ ।
अभिमुखीकरण तालिम प्रदायक संस्थाहरुबाट मापदण्डअनुसार काम नगरेको भन्दै विभागले पटक–पटक सचेत गराउनुका साथै अनुगमन र कारबाहीसमेत गर्दै आएको छ । वैदेशिक रोजगारीमा जाने श्रमिकहरुलाई अभिमुखीकरण गराउने महत्वपूर्ण जिम्मेवारी भए पनि कागजीरुपमा मात्रै गर्दै आएका घटना दोहोरिँदै आएका छन् । जसले गर्दा रोजगार गन्तव्य मुलुकमा पुगेपछि श्रमिकले समस्या बेहोर्नुपरेको विभागको भनाइ छ ।
