काठमाडौं- वैदेशिक रोजगारीका लागि पोल्याण्ड पठाइदिने भन्दै ठगी गरेको आरोपमा प्रहरीले एक जनालाई पक्राउ गरेको छ । पोल्याण्डमा आकर्षक तलबसहितको रोजगारी लगाइदिने भन्दै पीडितसँग रकम संकलन गरी फरार रहेको आरोपमा पुरण अस्लामीलाई प्रहरीले पक्राउ गरेको हो ।
पाल्पाको तिनाउ गाउँपालिका–६ स्थायी घर भई हाल काठमाडौं गोकर्णेश्वर बस्ने ४५ वर्षीय अस्लामीले धनञ्जय चौधरीलाई पोल्याण्ड जान आठ लाख रुपैयाँ लाग्ने भन्दै पीडितसँग पटक–पटक गरी एक लाख २० हजार रुपैयाँ लिएर ठगी गरेको प्रहरीले जनाएको छ ।
पोल्याण्डको एक प्रतिष्ठित होटलमा मासिक आकर्षक तलब हुने गरी काम लागाइदिने प्रलोभनमा पारी रकाम लिएर फरार रहेको अवस्थामा पक्राउ गरिएको प्रहरीले उल्लेख गरेको छ । अस्मालीलाई खोजतालासका क्रममा गोकर्णेश्वर नयाँबस्तीबाट पक्राउ गरिएको बताइएको छ ।
अस्मालीलाई काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले पक्राउ गरेको बताइएको छ । पीडितबाट पटक–पटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो ।
सोही आधारमा पक्राउ परेका उनलाई थप अनुसन्धान तथा कारबाहीका लागि विभागमा बुझाइएको प्रहरी उपरीक्षक रविन्द्र रेग्मीले जानकारी दिए ।
