भाषा परीक्षा, सीप परीक्षण तथा अन्तर्वार्तामा प्राप्त गरेको प्राप्तांकको आधारमा अधिकतम अंक पाएकाहरुमध्ये रोस्टरमा सूचीकृत गर्न पहिलो चरण र दोस्रो चरणमा गरी अनुमानित उत्तीर्ण संख्या दुई हजार ५०० को अन्तिम नतिजा प्रकाशन गरिने
काठमाडौं– रोजगारीका लागि दक्षिण कोरिया जान चाहने नेपाली युवाहरुका लागि इपिएस भाषा परीक्षाको आवेदन खुल्ने भएको छ । वैदेशिक रोजगार विभागअन्तर्गतको इपिएस कोरिया शाखाले पानीजहाज निर्माण (सिप बिल्डिङ)मा काम गर्न जानका लागि भाषा परीक्षाको आवेदन खुला गर्ने तयारी गरेको हो ।
शाखाले कोरियामा पानीजहाज निर्माणसम्बन्धी काम गर्न चाहने इच्छुक नेपाली श्रमिकले यही साउन २० देखि २४ गतेसम्म भाषा परीक्षाका लागि अनलाइन आवेदन खुला गर्ने जनाएको छ । शाखाले आइतबार एक सूचना निकालेर पानीजहाज निर्माण कम्पनीका लागि आवेदन माग भएअनुसार कामदार पठाउन असोज १ गतेदेखि भाषा परीक्षा हुने जानकारी दिएको छ ।
एक दिनमा चार सिफ्ट गरी परीक्षा सञ्चालन हुने तथा आवेदक संख्याका आधारमा परीक्षा तालिका फेरबदल हुनसक्ने सूचनामा उल्लेख छ । नेपाल सरकार र कोरिया सरकारबीच भएको जिटुजी सम्झौता अनुसार नै रोजगार अनुमति प्रणाली (इपिएस) अन्तर्गत नेपाली श्रमिक पठाउन छनोटका लागि भाषा परीक्षा आवेदन माग गरिएको शाखाले जनाएको छ । सिप बिल्डिङको क्षेत्रमा पनि श्रमिक छनोट प्रक्रिया अन्य क्षेत्रमा जाने श्रमिकको जस्तै हुनेछ । ईपीएसमार्फत कोरियामा रोजगारीका लागि जाने श्रमिकले उच्च अंककासाथ भाषा परीक्षा तथा सीप परीक्षण दुवैमा उत्तीर्ण हुनुपर्ने छ ।
भाषा परीक्षा, सीप परीक्षण तथा अन्तर्वार्तामा प्राप्त गरेको प्राप्तांकको आधारमा अधिकतम अंक पाएकाहरुमध्ये रोस्टरमा सूचीकृत गर्न पहिलो चरण र दोस्रो चरणमा गरी अनुमानित उत्तीर्ण संख्या दुई हजार ५०० को अन्तिम नतिजा प्रकाशन गरिने शाखाले जनाएको छ । जसमा श्रमिकको मागअनुसार उत्तीर्ण संख्या थपघट हुनसक्ने उल्लेख छ ।
उच्च अंकका साथ भाषा परीक्षा पास भई र सीप परीक्षणमासमेत उत्तीर्ण भएकाहरुले मात्रै रोजगारीका लागि आवेदन दिन सक्नेछन् । भाषा परीक्षामा १८ वर्ष उमेर पूरा भई ३९ वर्ष नकटेका तथा फौजदारी अभियोगमा अदालतबाट जेल सजाय नपाएका आवेदकहरु सहभागी हुन पाउने बताइएको छ । साथै, कोरियामा गएर गैरकानुनी गतिविधिमा संलग्न नभएको, नेपाल सरकारले अन्य मुलुकमा जान रोक नलगाएको, कोरियामा इ–९ र इ–९–१ भिसामा पाँच वर्षभन्दा कम अवधि बसेकाहरुले पनि आवेदन दिन पाउने छन् । यसअघि इपिएस भाषा परीक्षा दिएकाहरुले समेत यो परीक्षामा सामेल हुन सक्ने इपिएस कोरिया शाखाले जनाएको छ ।
कोरियामा सन् २००८ देखि इपिएस भाषा परीक्षा पास गरी म्यानुफ्याक्चरिङ र कृषिमा नेपाली श्रमिकहरु गइरहेका छन् । तर, सीप बिल्डिङको क्षेत्रमा भाषा तथा सीप परिक्षणका लागि आवेदन माग गरिएको पहिलोपटक हो । शाखाले यसअघि सीप बिल्डिङमा म्यानुफ्याक्चरिङको रोस्टरमा रहेका ८९२ जनालाई सीप बिल्डिङमा पठाउने निर्णय गरेको थियो ।
कोरियन भाषापरीक्षा उत्तीर्ण गर्नु रोजगारीको छनोट प्रक्रियामा सामेल भई रोस्टरमा सूचीकृतमात्रै हुने भएकाले शतप्रतिशत रोजगारीको ग्यारेन्टी नहुँदा कामदारलाई आफ्नो पेसा, व्यवसाय आदिलाई निरन्तरता दिन शाखाले आग्रह गरेको छ ।यसैबीच श्रम, रोजगार तथा समाजिक सुरक्षा मन्त्रालयले एक विज्ञप्ति जारी गर्दै मौसमी कामदारको रुपमा कोरिया पठाइदिने भन्दै ठूलो रकम उठाउन व्यक्ति तथा संस्थाहरु सक्रिय रहेको जानकारी आएकाले त्यस्ता भ्रामक समाचारबाट सचेत रहन सबैलाई अनुरोध गरेको छ ।
मन्त्रालयले मौसमी कामदारको भिसामा कोरियालगायतका अन्य देशहरुमा जान कोही कसैलाई पनि पैसा नबुझाउन आग्रह गरेको छ । मौसमी कामदारका लागि सरकारले कसैलाई पनि श्रम स्वीकृति प्रदान नगरिएको भन्दै मन्त्रालयले वैदेशिक रोजगार विभागबाट जारी हुने श्रम स्वीकृतिमात्र आधिकारिक कागजात भएकाले सोबाहेक कुनै प्रकारको कागजातको आधारमा वैदेशिक रोजगारीमा नजान पनि विभागले आग्रह गरेको छ ।
विभागबाट इजाजतपत्र प्राप्त संस्थाहरुबाहेक अन्य संस्थाहरुले वैदेशिक रोजगारीमा पठाउने सबै प्रकारका कार्य गैरकानुनी हुने भएकाले यससम्बन्धी जानकारी भएमा वा कसैले रोजगारीको प्रलोभन देखाइ ठगी गरेमा मन्त्रालय तथा विभागमा जानकारी गराई कारबाहीको दायरामा ल्याउन पनि सहयोग र सहकार्यका लागि मन्त्रालयले अनुरोध गरेको छ ।
-1752335779.jpg)
