काठमाडौं– वैदेशिक रोजगारीका लागि क्रोएसिया र माल्टा पठाइदिने भन्दै विभिन्न व्यक्तिलाई ठगी गरेको आरोपमा दुई जना पक्राउ परेका छन् । क्रोएसिया र माल्टामा आकर्षक तलबसहितको रोजगारी लगाइदिने भन्दै पीडितहरुबाट रकम संकलन गरी फरार रहेको आरोपमा प्रचलन राई र मौसम मग्रातीलाई प्रहरीले पक्राउ गरेको हो ।
उदयपुरको ताप्ली गाउँपालिका स्थायी घर भई हाल ललितपुर नखिपोट बस्ने ३० वर्षीय राईले समरबहादुर परियारलाई क्रोएसिया जान प्रतिव्यक्ति छ लाख रुपैयाँ लाग्ने र त्यहाँ प्रतिष्ठित कम्पनीमा काम लागाइदिने भन्दै पटक–पटक गरी छ लाख रुपैयाँ नै लिएर ठगी गरेको प्रहरीले जनाएको छ । उनले पीडितलाई क्रोएसियामा एक लाख रुपैयाँभन्दा बढी मासिक तलब हुने भनी विश्वास दिलाई पैसा लिएर सम्पर्कविहीन भएको अवस्थामा पक्राउ गरिएको प्रहरीले जनाएको छ । राईलाई खोजतलासका क्रममा नखिपोटबाटै पक्राउ गरिएको प्रहरीले जानकारी दिएको छ ।
त्यस्तै सुनसरीको बराहक्षेत्र नगरपालिका–७ स्थायी घर भई हाल भक्तपुर सुर्यविनायक बस्ने ३१ वर्षीय मग्रातीले टोकमान गुरुङलाई आकर्षक रोजगारीका लागि माल्टा पठाइदिने भन्दै रकम लिएर ठगी गरेको प्रहरीले जनाएको छ । उनले कति रकम लिएको भन्ने खुल्न बाँकी छ । पीडितलाई विश्वास दिलाई प्रलोभनमा पारी रकम संकलन गरी सम्पर्कविहीन रहेका मग्रातीलाई काँडाघारीबाट पक्राउ गरिएको प्रहरीले जनाएको छ ।
उनीहरु दुवै जनालाई काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले पक्राउ गरेको हो । पीडितबाट पटक–पटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका उनीहरुलाई थप अनुसन्धान तथा कारबाहीका लागि विभागमा बुझाइएको प्रहरी उपरीक्षक रविन्द्र रेग्मीले जानकारी दिए ।
