काठमाडौं - वैदेशिक रोजगारीका लागि अमेरिका पठाइदिन्छु भन्दै ठगी गरेको आरोपमा प्रहरीले एक जनालाई पक्राउ गरेको छ । आकर्षक तलबसहित अमेरिकामा रोजगारी लगाइदिने प्रलोभन देखाई पीडितबाट रकम संकलन गरी फरार रहेको आरोपमा सुजन अधिकारीलाई प्रहरीले पक्राउ गरेको हो ।
लमजुङको दोर्दी गाउँपालिका–१ स्थायी घर भई काठमाडौं वनस्थली बस्ने २८ वर्षीया अधिकारीले नुमा केसीलाई अमेरिका जान २० लाख रुपैयाँ लाग्ने र त्यहाँ प्रतिष्ठित कम्पनीमा आकर्षक काम लगाइदिने भन्दै पुरै रकम लिएर ठगी गरेको प्रहरीले जनाएको छ ।
उनले पीडितलाई अमेरिकामा चार लाख रुपैयाँभन्दा बढी मासिक तलब हुने भनी विश्वास दिलाई पैसा लिएर सम्पर्कविहीन भएको अवस्थामा पक्राउ गरिएको प्रहरीले उल्लेख गरेको छ । काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले अधिकारीलाई खोजतालासका क्रममा सोह्रखुट्टेबाट पक्राउ गरिएको बताइएको छ ।
पीडितबाट पटक–पटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले उनलाई पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका अधिकारीलाई थप अनुसन्धान तथा कारबाहीका लागि विभागमा बुझाइएको प्रहरी उपरिक्षक मिलन केसीले जानकारी दिए ।
-1752335779.jpg)
