काठमाडौं- संयुक्त अरब इमिरेट्स (युएई)स्थित नेपाली राजदूतावासले असार महिनाको कार्यसम्पादन विवरण सार्वजनिक गरेको छ । दूतावासले २०८० असार महिनामा सम्पादन भएका प्रमुख सेवाहरुको तथ्यांकीय विवरण सार्वजनिक गरेको हो ।
नेपालीहरुको प्रमुख श्रम गन्तव्यहरुमध्ये एक युएईमा रहेको नेपाली दूतावासले आफूले गरेका प्रमुख कार्यसम्पदानको विवरण महिनैपिच्छे सार्वजनिक गर्दै आइरहेको छ । दूतावासले नेपालीहरुको समस्या समाधान तथा सहजीकरणमा गरेको कार्यसम्पादन तथा प्रगति विवरणमा असारमा तीन हजार ६०५ पासपोर्ट नवीकरणका लागि संकलन भएको उल्लेख गरिएको छ । साथै, तीन हजार २६६ वटा पासपोर्ट नवीकरणपश्चात् वितरण गरिएको जनाएको छ ।
त्यस्तै ३६ जनालाई भिसा प्रदान गरिएको छ भने ९० जनाको ट्राभल डकुमेन्ट बनाइएको छ विवरणमा उल्लेख छ । यसैगरी १५२ जनाको कागजात प्रामाणीकरण गरिएको, संस्थागतरुपमा आएका १५८ वटा मागपत्र प्रमाणीकरण भएको, ८७ वटा समूहगत भिसा प्रमाणीकरण गरेको दूतावासले असार महिनामा विभिन्न कारणले युएईमा मृत्यु भएका नेपालीहरुको १५ वटा शव व्यवस्थापन भएको उल्लेख गरेको छ । यस्तै विभिन्न माध्यमबाट आएका ५३१ वटा गुनासा तथा उजुरीहरुको सम्बोधन गर्दै असारमा श्रमिकहरुलाई क्षतिपूर्ति र बिमाबापत लाख ५६ हजार ३८४ एइडी अर्थात् झण्डै ९१ लाख ७० हजार रुपैयाँ खर्च भएको दूतावासले विवरणमा समेटेको छ ।
‘राहदानी वितरणमा कुनै शुल्क लाग्दैन’
यस्तै साउदी अरेबियाको रियादस्थित नेपाली राजदूतावासले नवीकरणपश्चात सम्बन्धित व्यक्तिलाई राहदानी वितरण गर्दा कुनै शुल्क नलाग्ने बताएको छ ।
राहदानी वितरण गर्दा श्रमिकसँग कतिपय व्यक्ति र संस्थाले अनधिकृत रकम असुल्ने गरेको गुनासो आएको भन्दै दूतावासले यसमा कुनै शुल्क नलाग्ने प्रस्ट पारेको छ ।
दूतावासले राहदानी नवीकरणका लागि आवेदन दिँदा नै सम्पूर्ण राजस्व बुझाइसकेपछि कहीँ कतै पुनः शुल्क बुझाउनु नपर्ने भन्दै ठगी हुनबाट जोगिन सम्बन्धित सबैलाई आग्रह गरेको छ ।
राहदानी लिँदा कुनै पनि शुल्क नतिर्न अनुरोध गर्दै दूतावासले यदि कोही व्यक्ति वा संघसंस्थाले सेवाको नाममा अनधिकृतरूपमा रकम लिएमा त्यो ठगी हुने र त्यसको जबाफदेहिता स्वयं व्यक्ति वा संस्था हुने उल्लेख गरेको छ ।
राहदानी वितरणमा कुनै शुल्क नलाग्ने बताउँदै अनधिकृत रकम नतिर्न सजग गराएको दूतावासले त्यस्तो कार्यमा संलग्नलाई कारवाही गर्नेसम्बन्धमा भने कुनै प्रतिबद्धता जनाएको छैन ।
