काठमाडौं - वैदेशिक रोजगारीका लागि दुबई पठाइदिन्छु भन्दै ठगी गरेको आरोपमा प्रहरीले एक जनालाई पक्राउ गरेको छ । आकर्षक तलबसहित दुबईमा रोजगारी लगाइदिने भन्दै पीडितबाट रकम संकलन गरी फरार रहेको आरोपमा विरु पौडेललाई प्रहरीले पक्राउ गरेको हो ।
सप्तरीको कञ्चनरुप नगरपालिका–४ स्थायी घर भई भक्तपुर लोकन्थली बस्ने ३२ वर्षीया पौडेलले विजय चौलागाईंसमेतलाई दुबईस्थित प्रतिष्ठित कम्पनीमा काम लगाइदिने भन्दै रकम लिएर ठगी गरेको प्रहरीले जनाएको छ । उनले पिडितसँग कति रकम लिई ठगी गरेको भन्ने कुरा प्रहरीले खुलाएको छैन ।
दुबईमा ५० हजार रुपैयाँभन्दा बढी मासिक तलब हुने भनी विश्वास दिलाई पैसा लिएर सम्पर्कविहीन भएको अवस्थामा पक्राउ गरिएको प्रहरीले उल्लेख गरेको छ । पौडेललाई खोजतालासका क्रममा लोकन्थलीबाटै पक्राउ गरिएको प्रहरीले जनाएको छ ।
उनलाई काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले पक्राउ गरेको हो । पीडितबाट रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका पौडेललाई थप अनुसन्धान तथा कारबाहीको लागि विभागमा बुझाइएको प्रहरी उपरीक्षक रवीन्द्र रेग्मीले जानकारी दिए ।
-1745656903.jpeg)