काठमाडौं - वैदेशिक रोजगारीका लागि मकाउ पठाइदिन्छु ठगी गरेको आरोपमा प्रहरीले एक जनालाई पक्राउ गरेको छ । आकर्षक तलबसहित मकाउमा रोजगारी लगाइदिने भन्दै पीडितबाट रकम संकलन गरी फरार रहेको आरोपमा दुर्गाबहादुर रेग्मीलाई प्रहरीले पक्राउ गरेको हो ।
गोरखाको गण्डकी गाउँपालिका–८ स्थायी घर भई ललितपुर गोदावरी बस्ने ५१ वर्षीय रेग्मीले जितबहादुर थापा मगरलाई मकाउ जान प्रतिव्यक्ति छ लाख ६० हजार रुपैयाँ लाग्ने र त्यहाँ प्रतिष्ठित होटलमा क्लिनरको काम लगाइदिने भन्दै पूरै रकम लिएर ठगी गरेको प्रहरीले जनाएको छ ।
उनले पीडितलाई मकाउमा एक लाख २० हजार रुपैयाँभन्दा बढी मासिक तलब हुने भनी विश्वास दिलाई पैसा लिएर सम्पर्कविहीन भएको अवस्थामा पक्राउ गरिएको प्रहरीले उल्लेख गरेको छ । रेग्मीलाई खोजतालासका क्रममा कालिमाटीबाट पक्राउ गरिएको प्रहरीले जनाएको छ ।
उनलाई काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले पक्राउ गरेको हो । पीडितबाट पटक–पटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो ।
सोही आधारमा पक्राउ परेका रेग्मीलाई थप अनुसन्धान तथा कारबाहीको लागि विभागमा बुझाइएको प्रहरी उपरिक्षक रविन्द्र रेग्मीले जानकारी दिए
-1745656903.jpeg)