दोहा– गैरआवासीय नेपाली संघ एनआरएनए साउदीले वैदेशिक रोजगारलाई व्यवस्थित र मर्यादित बनाउन १० बुँदे मागसहितको धयाकर्षण तथा ज्ञापनपत्र बुझाएको छ । साउदी भ्रमणमा रहेको वैदेशिक रोजगार विभागको टोलीलाई भेटेर एनआरएनएले वैदेशिक रोजगारलाई व्यवस्थित र मर्यादित बनाउनसमेत आग्रह गरेको छ ।
रोजगारको सिलसिलामा साउदीमा रहेका नेपाली श्रमिकहरूको समस्या समाधान र न्यूनीकरणका लागि नेपालबाट आएका विभिन्न व्यक्तित्वहरूमाझ ज्ञापनपत्र हस्तान्तरण गरिएको हो । भ्रमण टोलीमा मलेसियाका पूर्वराजदूत डा.ऋषिराज अधिकारी, परराष्ट्र मन्त्रालय, मध्य तथा पश्चिम एसिया एवं अफ्रिका महादेश हेर्ने महाशाखा तथा शाखा प्रमुख हरिशचन्द्र घिमिरे, श्रम रोजगार तथा सामाजिक सुरक्षा मन्त्रालय अन्तर्गत वैदेशिक रोजगार विभागका निबर्तमान महानिर्देशक डा.भीष्मकुमार भुसाल, परराष्ट्र मन्त्रालयका सहसचिब कुलबहादुर मगर, श्रम रोजगार तथा सामाजिक सुरक्षा मन्त्रालयका रोजगार व्यवस्थापन महाशाखाका शाखा अधिकृत जमुना काङ्खलेलगायत रहेका छन् ।
भ्रमण टोली र नेपाली दूताबास रियादका नियोग प्रमुख दिलिपकुमार पौडेललाइ नेपाली श्रमिककहरूका हितका लागि सम्बन्धित निकाय र सरोकारवालाहरूको ध्यानाकर्षण सहित आवश्यक पहल गरिदिने संघले आशा व्यक्त गरेको उल्लेख गर्दै ज्ञापनपत्र बुझाएको हो । ज्ञापनपत्रमा म्यानपावर व्यवसायी र बिचौलियाद्वारा नेपाली श्रमिकमाथि भइरहेको ठगी रोकिनुपर्ने, सम्झौता अनुसारको तलब सेवा सुविधा उपलब्ध हुनुपर्ने, श्रम सम्झौताको पूर्ण पालना हुनुपर्ने, पुनः श्रम स्विकृतिको नयाँ नीतिले निम्त्याएको प्रतिकूल असर हल गर्नुपर्नेलगायत माग समेटिएको ज्ञापनपत्र बुझाएको एनआरएनए एनसिसी साउदीका अध्यक्ष तेजबहादुर थापाले जानकारी दिए ।
यसैगरी ज्ञापनपत्रमा श्रमिकका समस्या छिटो समाधान गर्नको निम्ति स्वयंसेवक परिचालन सम्बन्धी व्यवस्था गर्नुपर्ने, साउदी अरबमा काम गर्ने नेपालीको जीवन रक्षा गर्नुपर्ने, दक्ष जनशक्ति तथा बिदेशमा सीप सिकेर नेपाल फर्केका नेपाली श्रमिकको ब्यवस्थापन हुनुपर्ने, नेपाली महिला कामदारहरूको सुरक्षा र ब्यवस्थापनमा ध्यान दिनुपर्ने, नेपाली श्रमिकहरूको न्युनतम ज्यालाको मापदण्ड बनाउनुपर्ने, दक्ष कामदारहरूको पैठारी गर्नुपर्ने रहेका छन् ।
परराष्ट्र मन्त्रालयको नेतृत्वमा श्रम मन्त्रालयका प्रतिनिधि एवं विज्ञ व्यक्ति विशेष संलग्न श्रमिक समस्या अध्ययन टोलीसंगको अन्तरक्रिया कार्यक्रम फलदायी भएको अध्यक्ष थापाले बताए ।
