काठमाडौं - वैदेशिक रोजगारीमा जाने श्रमिकलाई विभिन्न तालिम दिने तालिमप्रदायक संस्थाहरु असार मसान्तभित्र नवीकरण गरिसक्नुपर्ने सीमा तोकिएको छ ।
वैदेशिक रोजगार विभागले एक सूचना जारी गर्दै यसअघि तालिम सञ्चालनका लागि इजाजतपत्र प्राप्त गरेका तालिम प्रदायक संस्थाहरुलाई कानुनमा उल्लेख भएबमोजिम तोकिएको दस्तुर र कागजात पेस गरी असार मसान्तसम्म नवीकरण गर्न निर्देशन दिएको हो ।
विभागले सीपमूलक, केयरगिभर र घरेलु कामदार गरी तीन किसिमका तालिम प्रदायक संस्थाहरुले तोकिएअनुसार नवीकरण गर्नुपर्ने जनाएको छ । सबै संस्थालाई नवीकरण शुल्क १० हजार रुपैयाँ तोकिएको छ ।
सीपमूलक तालिम दिने संस्थाहरुले आर्थिक वर्ष २०७८/७९ को कर चुक्ता प्रमाणपत्र, तालिम सञ्चालनको वार्षिक विवरण, लेखापरीक्षण प्रतिवेदन, न्यूनतम दुई वर्षको घरभाडा सम्झौता, इजाजतपत्र पेस गर्नुपर्नेछ ।
त्यस्तै केयरगिभर तथा घरेलु कामदार तालिम प्रदायकले पनि अघिल्लो वर्षको प्रगति विवरण, संस्थाको भौतिक, वित्तीय र जनशक्ति विवरण, आर्थिक वर्ष २०७८/७९ को कर चुक्ता प्रमाणपत्र, लेखापरीक्षण प्रतिवेदन, मन्त्रालय, विभाग र सचिवालयबाट भएको अनुगमनको प्रगति विवरण र इजाजतपत्र पेस गर्नुपर्नेछ ।
