काठमाडौं - वैदेशिक रोजगार विभागको कार्यालय ताहाचलमा सारिएको छ । आज (शुक्रबार)देखि विभागको सम्पूर्ण सेवा ताहचलबाट प्रवाह हुनेछ ।
यसअघि विभागले एक सूचना जारी गर्दै जेठ २१ गतेदेखि आंशिकरुपमा र असार १ गतेबाट सम्पूर्ण सेवा ताहचलबाट प्रवाह गर्ने जनाएको थियो ।
विभागलाई पूर्णरुपमा सेवा दिनेगरी ताहाचलस्थित वैदेशिक रोजगार कार्यालय रहेको स्थानमा सारिएको विभागका निर्देशक एवं सूचना अधिकारी गुरुदत्त सुवेदीले जानकारी दिए ।
‘अब विभागबाट हुने वैदेशिक रोजगारसम्बन्धी सम्पूर्ण गतिविधिहरु वैदेशिक रोजगार कार्यालयपरिसरभित्रैबाट हुनेछ,’ उनले भने । यसअघि विभागले काठमाडौंको बुद्धनगरमा रहेको हिमालयन सीमापार व्यापार संघको भवन भाडामा लिएर सेवा प्रवाह गर्दै आएको थियो ।
पार्किङलगायत भौतिक संरचनासमेत अपुग रहेका कारण वैदेशिक रोजगार कार्यालय परिसरमा विभागलाई सारिएको बताइएको छ ।
यस्तै विभागको कार्यालय ताहचलमा स्थानान्तरणका क्रममा अनलाइन सेवा प्रवाह आंशिक तथा पूर्णरुपमा अवरोध हुनसक्ने विभागले जनाएको छ ।
विभागले बिहीबार एक सूचना जारी गर्दै अनलाइन सेवाका लागि बिहीबार बेलुका सर्भर तथा अन्य उपकरण सार्ने कार्य हुने भएकाले विभाग र वैदेशिक रोजगार कार्यालयको वेवसाइटको सेवा प्रवाह अवरोध हुनसक्ने जनाएको छ ।
प्रकाशित मिति: शुक्रबार, असार १, २०८० ०७:३६
-1745656903.jpeg)