काठमाडौं - वैदेशिक रोजगारीका लागि कुवेत पठाइदिने भन्दै विभिन्न व्यक्तिलाई ठगी गरेको आरोपमा एक जना पक्राउ परेका छन् । कुवेतमा आकर्षक तलबसहितको रोजगारीमा लगाइदिने भन्दै १३ जनासँग रकम संकलन गरी फरार रहेको आरोपमा विजय पुलामी मगरलाई प्रहरीले पक्राउ गरेको हो ।
मकवानपुरको भिमफेदी गाउँपालिका–६ स्थायी घर भई हाल काठमाडौं कलंकी बस्ने ३७ वर्षिया मगरले वीरबहादुर गुरुङसमेत १३ जनालाई कुवेत जान प्रतिव्यक्ति दुई लाख रुपैयाँ लाग्ने र प्रतिष्ठित कम्पनीमा काम लागाइदिने भन्दै पटक–पटक गरी सात लाख ७५ हजार रुपैयाँ लिएर ठगी गरेको प्रहरीले जनाएको छ ।
उनले पीडितहरुलाई कुवेतमा ५५ हजार रुपैयाँभन्दा बढी मासिक तलब हुने भनी विश्वास दिलाई पैसा लिएर सम्पर्कविहीन भएको अवस्थामा पक्राउ गरिएको प्रहरीले जनाएको छ । मगरलाई खोजतालासका क्रममा काठमाडौं पुतलीसडकबाट पक्राउ गरिएको प्रहरीले जनाएको छ ।
उनलाई काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले पक्राउ गरेको हो । पीडितहरुबाट पटकपटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो ।
सोही आधारमा पक्राउ परेका उनीहरुलाई थप अनुसन्धान तथा कारबाहीको लागि विभागमा बुझाइएको प्रहरी उपरीक्षक रविन्द्र रेग्मीले जानकारी दिए ।
प्रकाशित मिति: बुधबार, जेठ ३१, २०८० ११:११
-1745656903.jpeg)