काठमाडौं - वैदेशिक रोजगारीमा पठाइदिने भन्दै विभिन्न व्यक्तिलाई ठगी गरेको आरोपमा दुई जना पक्राउ परेका छन् । माल्टा र अमेरिकामा आकर्षक तलबसहितको रोजगारी लगाइदिने भन्दै पीडितहरुबाट रकम संकलन गरी फरार रहेको आरोपमा प्रविन खड्का र सुनिता न्यौपाने श्रेष्ठलाई प्रहरीले पक्राउ गरेको हो ।
मुगुको छाँयानाथ रारा नगरपालिका स्थायी घर भई हाल काठमाडौं कलंकी बस्ने ३४ वर्षीया खड्काले कर्णबहादुर बुढासमेत दुई जनालाई माल्टा जान प्रतिव्यक्ति ११ लाख ५० हजार रुपैयाँ लाग्ने र प्रतिष्ठित कम्पनीमा काम लागाइदिने भन्दै पटक–पटक गरी नौ लाख रुपैयाँ लिएर ठगी गरेको प्रहरीले जनाएको छ ।
उनले पीडितहरुलाई माल्टामा एक लाख रुपैयाँभन्दा बढी मासिक तलब हुने भनी विश्वास दिलाई पैसा लिएर सम्पर्कविहीन भएको अवस्थामा पक्राउ गरिएको प्रहरीले जनाएको छ । खड्कालाई खोजतालासका क्रममा काठमाडौं कुलेश्वरबाट पक्राउ गरिएको प्रहरीले जनाएको छ ।
त्यस्तै उदयपुरको चौदण्डी नगरपालिका–७ वेलटार स्थायी घर भई हाल ललितपुरको गोदावरी बस्ने ३७ वर्षीया श्रेष्ठले ओमनाथ मैनालीलाई रोजगारीका लागि अमेरिका जान ३१ लाख रुपैयाँ लाग्ने भन्दै पटक–पटक गरी छ लाख २१ हजार रुपैयाँ लिएर ठगी गरेको प्रहरीले जनाएको छ ।
अमेरिकामा मोबाइल सफ्टवेयर कम्पनीमा काम गरेबापत मासिक तीन लाख ५० हजार रुपैयाँभन्दा बढी तलब हुने भन्दै विश्वास दिलाई प्रलोभनमा पारी रकम संकलन गरी सम्पर्कविहीन अवस्थामा श्रेष्ठलाई पक्राउ गरिएको प्रहरीले उल्लेख गरेको छ । उनलाई ललितपुर पुल्चोकबाट पक्राउ गरिएको हो ।
उनीहरु दुवै जनालाई काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले पक्राउ गरेको हो । पीडितबाट पटक–पटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभागले उनीहरुलाई पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका उनीहरुलाई थप अनुसन्धान तथा कारबाहीका लागि विभागमा बुझाइएको प्रहरी उपरीक्षक रविन्द्र रेग्मीले जानकारी दिए ।
