काठमाडौं– कोरिया सरकारले नक्कली परीक्षार्थीमार्फत इपिएस भाषा परीक्षा उत्तीर्ण गरी कोरिया पुगेका सय जनाभन्दा बढी नेपाली कामदार स्वदेश फिर्ता पठाउने भएको छ ।
अनुहार मिल्नेलाई भाषा परीक्षा लेख्न लगाई कोरिया आएको सूचनाका आधारमा कोरिया अध्यागमन कार्यालयले एक जनालाई पक्राउ गरेपछि त्यसैको आधारमा कोरिया सरकारले अनुसन्धान गर्दा सय जनाभन्दा बढी नक्कली परीक्षार्थीमार्फत इपिएस भाषा परीक्षा उत्तीर्ण गरेको भेटिएपछि उनीहरूलाई कोरियाले स्वदेश फर्काउने भएको हो ।
पक्राउ परी नेपाल फिर्ता हुनेहरूमा कोरिया गई ३ महिनादेखि साढे ३ वर्षसम्म बसेका रहेको कार्यालयले जनाएको छ । यसरी पक्राउ पर्नेहरूमा ताप्लेजुङ, पाँचथर, म्याग्दीलगायत जिल्लाबाट जाने नेपाली कामदारहरूको संख्या ठूलो रहेको कोरियास्थित प्रवासी श्रमिक संगठन (एमटियु)ले जनाएको छ ।
नक्कली परीक्षार्थीमार्फत इपिएस भाषा परीक्षा दिन लगाउने घटना यसअघि पनि भएको थियो । २५ जेठ ०२६ मा महानगरीय अपराध महाशाखा, महानगरीय प्रहरी परिसर टेकु, महानगरीय प्रहरी परिसर ललितपुर तथा स्थानीय प्रहरी इकाइबाट खटिएको टोलीले काठमाडौं र ललितपुरका विभिन्न परीक्षा केन्द्रहरूबाट अरुको नामको परीक्षामा सहभागी भएका ५५ जनालाई नियन्त्रणमा लिएको थियो ।
पहिलो चरणको पहिलो दिनको पहिलो सिफ्ट र दोस्रो सिफ्ट कोरियन भाषा परीक्षाको २८ वटा परीक्षा केन्द्रहरूबाट अरुकोे नाममा परीक्षा दिन परीक्षा हलभित्र प्रबेश गरेका २ महिला र ५३ जना पुरुष गरी जम्मा ५५ जना नक्कली प्रशिक्षार्थीहरूलाई पक्राउ गरी आवश्यक कारबाहीका लागि सम्बन्धित प्रहरी इकाईहरूमा महानगरीय अपराध महाशाखाले बुझाइएको थियो ।
अरुलाई परीक्षा लेखाई कोरिया पुगेका नेपालीलाई सोझै नेपाल फिर्ता गर्ने र अरुको परीक्षा सहभागी हुनेहरूलाई भने विभिन्न सुरक्षा सम्बन्धी मुद्दा चलाई अनुसन्धान अगाडि बढाइएको अध्यागमन कार्यालयले जनाएको छ ।
प्रकाशित मिति: सोमबार, फागुन ५, २०७६ ०४:५९
-1745656903.jpeg)