काठमाडौं - सरकारले भारत हुँदै तेस्रो मुलुकको यात्रा गर्ने नेपाली नागरिकलाई अनिवार्य ‘नो अब्जेक्सन सर्टिफिकेट (एनओसी)’ लिनुपर्ने व्यवस्था गरेको छ । विशेषगरी वैदेशिक रोजगारीमा जाने नेपालीहरुले भारतीय अध्यागमन पार गर्न भारतस्थित नेपाली दूतावासबाट एनओसी लिनुपर्ने व्यवस्था गरेको हो ।
नेपाली दूतावासले एक सूचना जारी गर्दै वैदेशिक रोजगारीका लागि भारत हुँदै साउदी अरब, कतार, कुवेत, ओमान, युएई, बहराइन, इराक, लिबिया र लेबनान गरी नौ वटा मुलुकमा जाने नेपालीले एनओसी लिनुपर्ने जनाएको छ । दूतावासले ती देशमा यात्रा गर्नुपर्ने मनासिव कारण र औचित्य पुष्टि भएमा एनओसी जारी गर्ने उल्लेख गरेको छ ।
एनओसी लिनका लागि भारत हुँदै तेस्रो मुलुक जानुपर्ने मनासिव कारणसहित सम्बन्धित व्यक्तिको हस्ताक्षरसहितको निवेदन, यात्रा गर्ने व्यक्तिको राहदानी र सोको प्रतिलिपि, गन्तव्य देशको भिसा र हवाई टिकटको प्रतिलिपि, वैदेशिक रोजगार विभाग वा अन्तर्गतबाट जारी श्रम स्वीकृतिको प्रतिलिपि बुझाउनुपर्नेछ ।
त्यस्तै यसअघि भारतबाहेक तेस्रो मुलुक भ्रमण गरेको भएमा यात्रा अभिलेख (भिसा, आगमन, प्रस्थान आदि) को प्रतिलिपि र अध्ययन, व्यवसायको सिलसिलामा भारतमा रहेका नेपाली नागरिकको हकमा सो सम्बन्धित परिचयपत्र वा कागजात पेस गर्नुपर्नेछ भने एक हजार भारतीय रुपैयाँ शुल्क लाग्ने जनाइएको छ ।
दूतावासले नेपालको एयरपोर्टबाट यात्रा गरी भारतमा ट्राञ्जिट भएका र अमेरिका, बेलायत, क्यानडा, अस्ट्रेलिया र युरोपेली मुलुकका भिसा तथा वसोवासका अनुमति लिएका नेपालीहरुलाई भने एनओसी आवश्यक नपर्ने प्रस्ट पारेको छ । गैरकानुनी धन्दामा सक्रिय गिरोहले वैदेशिक रोजगारीमा आकर्षक आम्दानीको प्रलोभन देखाई नेपाली युवालाई भारत हुँदै तेस्रो मुलुकमा पठाउने क्रम बढेको भन्दै यसको नियन्त्रणका लागि एनओसी जारी गर्नुपर्ने अवस्था आएको दूतावासले जनाएको छ ।
गिरोहले विशेषगरी महिलाहरुलाई घरेलु कामदारको रुपमा उल्लिखित मुलुकमा पठाउन भारतको विमानस्थल प्रयोग गर्ने गरेको विभिन्न अध्ययनले देखाएको छ । त्यस्ता महिलालाई विभिन्न समयमा भारतबाट दूतावासको पहलमा उद्धारसमेत गरिँदै आएको छ ।
प्रकाशित मिति: बुधबार, जेठ २४, २०८० ०७:३०
-1745656903.jpeg)