काठमाडौं – दक्षिण कोरियाले रोजगार अनुमति प्रणाली (इपिएस) मार्फत पानीजहाज निर्माणका लागि नेपालीहरुलाई पनि अवसर दिने भएको छ । कोरियाको मागअनुसार पानीजहाज निर्माणसम्बन्धी कामका लागि सरकारले सुरुमा ७२६ जनाको नामावली पठाइसकेको छ ।
कोरियाले जुन १९ अर्थात् असार पहिलो साताबाट नेपालसहित अन्य इपिएस लागू गरिएका मुलुकहरुबाट कामदार लैजाने जनाएको छ । पहिलो चरणमा इपिएस सदस्य मुलुकबाट कोरियाले दुई हजार कामदार लैजाने बताइएको छ । जहाज निर्माण कम्पनीहरुमा कामदारको अभाव बढ्दै गएपछि कोरियाले उत्पादनमूलक र कृषि तथा पशुपालन क्षेत्रमामात्रै नभई ‘शिप बिल्डिङ’मासमेत कामदार लैजान लागेको हो ।
पानीजहाज निर्माणसम्बन्धी काम गर्न नेपालीहरुको माग भएअनुसार उत्पादनमूलक क्षेत्रको रोस्टरबाट छानिएका कामदारहरुलाई कोरिया पठाइने वैदेशिक रोजगार विभागअन्तर्गत इपिएस शाखाका निर्देशक पुष्पराज कटुवालले जानकारी दिए । ‘शिप बिल्डिङमा तीन हजार कामदारको माग भए पनि पहिलोपटक थोरैमात्र कामदार पठाउने गरी रोस्टर पठाएका छौं,’ उनले भने, ‘यो क्षेत्र नयाँ भएकाले अहिलेलाई थोरैमात्र कामदार पठाएर बाँकीलाई विस्तारै पठाउनेगरी रोस्टर बनाउँछौं ।’
पानी जहाज निर्माणमा जाने नेपालीहरुले एक महिनाको तालिम लिनुपर्नेछ । कामदारले तालिम अवधिको पनि पारिश्रमिक पाउने छन् । जहाज निर्माणका लागि जाने कामदारहरु उत्पादनमूलक क्षेत्रबाटै छनोट गरिने र उनीहरुको करार अवधि पनि सोहीबमोजिम हुने शाखाले जनाएको छ । तर, कामदारले कार्यस्थल परिवर्तन गर्न चाहेमा अर्को उस्तै कम्पनीमामात्रै जान पाइने बताइएको छ ।
प्रकाशित मिति: मंगलबार, जेठ २३, २०८० १०:३२
-1745656903.jpeg)