दोहा– नेपाली व्यवसायी संघ कतारका नवनिर्वाचित कार्यसमितिले कतारका लागि नेपाली राजदूत डा.नारदनाथ भारद्वाजसँग भेट गरेका छन् । कतारमा विभिन्न क्षेत्रमा व्यवसायलाई आफ्नो मुख्य कर्म बनाएका नेपाली व्यवसायीहरूको छाता संस्थाका रूपमा स्थापित संघको पहिलो महाधिबेशनले चयन भएका नयाँ कार्यसमितिका पदाधिकारी र दूताबासबीच समसामयिक विषयमा छलफल भएको नेपाली व्यवसायी संघका अध्यक्ष महेन्द्र चौलागाईले जानकारी दिए ।
भेटघाटका क्रममा नेपाली व्यवसायी संघले दुई वर्ष पहिले नै दूताबासमा सूचीकृत गरिएको संघको नयाँ कार्यसमितिको नामावलीसमेत बुझाएको छ । २०२०–२४ का लागि चयन भएका नयाँ कार्यसमितिको नामावली बुझ्दै राजदूत डा.भारद्वाजले नयाँ कार्यसमितिलाई बधाई तथा शुभकामना दिएका थिए ।
समग्र नेपाल र नेपालीको पहिचानका रूपमा रहेका नेपाली व्यवसायीहरूले सधैँ मर्यादित, विश्वासनीय र उदाहरणीय काम गर्नेमा विश्वस्त रहेको र चारवर्षे कार्यकालमा केही दिर्घकालीन योजना ल्याएर अघि बढ्न व्यवसायीहरूलाई राजदूत डा.भारद्वाजले आग्रह गरेका थिए । करोडौँको लगानी गरेर व्यवसाय सञ्चालन गर्दा पनि नेपाल सरकारले व्यवसायीलाई पहिचान नगर्दा झन्झटिलो प्रक्रियामार्फत श्रम स्विकृती गर्नु पर्ने भन्दै यसमा सहजीकरण गरिदिन राजदूत डा.भारद्वाजलाई आग्रह गरेका छन् ।
-1745656903.jpeg)