दोहा– कुवेतको सिजिजिसी कम्पनीमा भएको दुर्घटनामा ६ जना नेपालीले ज्यान गुमाएको कुवेतस्थित नेपाली दूतबासले जनाएको छ । दूताबासका अनुसार बुधबार दिनको समयमा निर्माणस्थलमा काम गरिरहेका नेपाली कामदारहरूमाथि बालुवाको ढिस्को खस्दा उनीहरूको मृत्यु भएको हो ।
दुर्घटनामा परी मृत्यु भएका ६ जना नेपाली मध्ये ४ जनाको पहिचान खुलेको छ । नेपाली दूतावासले प्रेस विज्ञप्ति जारी गरी मृतकहरूको परिचय खुलेको जानकारी दिएको हो ।
दूताबासका अनुसार मृत्यु हुनेहरूमा पाल्पाका एकबहादुर गाहा मगर, सिराहाका गंगाराम चौधरी, ताप्लेजुङका वसन्त गुरुङ, र दाङका श्यामनारायण चौधरी रहेका छन् । मृत्यक मध्ये अन्य दुईजनाको विवरण खोजी भइरहेको दूताबासले जनाएको छ । यस्तै दुर्घटनामा घाइते भएका धर्मेन्द साहको उपचार भइरहेको छ भने अर्का घाइते मनोरथ मण्डल उपचारपछि काममा फर्केको दूताबासले जनाएको छ ।
अहिलेसम्म ६ जना नेपालीको ज्यान गएको पुष्टि भएको दूताबासकी द्वितीय सचिव जानकी ओझाले जानकारी दिइन् । कुवेतको ८० नम्बर रोड अल मुतल्लामा चिनियाँ कम्पनी सिजिजिसीका कामदारहरू दुर्घटनामा परेका थिए । दुर्घटना हुने बेला १३ जना कामदारहरूले काम गरिरहेको कम्पनीले जनाएको छ ।
चिनियाँ कम्पनी सिजिजिसीले निर्माणको जिम्मा लिएको मुत्ला सिटी प्रोजेक्टको निर्माणस्थलमा काम गरिरहँदा एक्कासि बालुवा र ढुंगा खसेको थियो । काम चल्दै गर्दा अचानक माटो खस्न थालेको देखेपछि ३ जना कामदार चिच्याउँदै भागेका थिए । उनीहरू सकुशल छन् । दुर्घटनामा २ जना घाइते भएका छन् । उनीहरूको अहिले कुवेतको जाहारा अस्पतलमा उपचार भइरहेको छ । दुर्घटनामा उनीहरूको टाउको भागसम्म पुरिएको अवस्थामा उद्धार गरिएको दूताबासले जनाएको छ ।
उनीहरूलाई उपचारका लागि अस्पताल पुर्याइएको र घटनामा ८ नेपाली कामदार परेको जानकारी आएको द्वितीय सचिव ओझाले बताइन् । चिनियाँ कम्पनीले काम गरिरहेको निर्माणस्थलमा बालुवा गिट्टीको थुप्रो खस्दा दुर्घटना भएको हो ।
