काठमाडौं– आर्थिक वर्ष ०७६÷७७ को पहिलो ६ महिनासम्म वैदेशिक रोजगार विभागमा उजुरीे संख्याको वृद्धि भए तापनि फरफारकमा भने आवश्यक चुस्तता आउन सकेको छैन । सरकारले वैदेशिक रोजगारलाई व्यवस्थित गर्ने भन्दै आए पनि विभागले आ.व.०७६÷७७ को आधा अवधि अर्थात् ६ महिना सकिँदा पनि दर्ता भएका उजुरीको आधा पनि फरफारक गर्न नसकेपछि प्रश्न उठ्न थालेको छ ।
आ.व ०७६÷७७ को पुस अन्तिमसम्म विभागमा २ हजार ९ सय ७७ वटा उजुरी दर्ता भएका छन् भने विभागले १ हजार ३ सय ६४ वटाको मात्र फरफारक गरेको छ । विभागमा दर्ता भएका २ हजार ९ सय ७७ वटा उजुरीमध्ये १ हजार ८ सय ७६ संस्थागत र १ हजार १ सय १ व्यक्तिगत रहेका छन् । जस्मा ३ सय ५० उजुरीविरुद्ध अदालतमा मुद्दा दायर भएका छन् भने ३ सय ३१ उजुरी तामेलीमा राखिएको छ । विभागका शाखा अधिकृत कुशल बरालका अनुसार कार्यभार अत्याधिक र कर्मचारी संख्या कमी भएकाले यस्तो समस्या सिर्जना भएको हो ।
वैदेशिक रोजगारमा जानेको संख्या आ.व ०७६÷७७ को अहिले सम्म २ लाख ५२ हजार ७ सय ५१ पुगेको छ । सरकारले म्यानपावर कम्पनीमार्फत कामका लागि जान सक्ने भन्दै १ सय ७२ वटा देशका लागि स्विकृति दिएको छ । चालू आर्थिक वर्षको पहिलो छ महिनामा मात्र संस्थागत अर्थात् म्यानपावर कम्पनीले २३ करोड ९१ लाख ५ हजार १ सय ९३ रूपैयाँ ठगी गरेको दाबी गर्दै पीडितहरूले विभागमा उजुरी दर्ता गराएका छन् । व्यक्तिगत रूपमा भने १७ करोड ४६ लाख ६७ हजार ४१ रूपैयाँ ठगी गरेको दाबी गर्दै विभागमा उजुरी दर्ता भएको छ । संस्थागत रूपमा ठगिएको भन्ने निवेदनमाथि विभागले नै कारबाही गर्छ तर व्यक्तिमार्फत् ठगिएको उजुरीलाई विभागले अनिवार्य प्रमाणको आधारमा दर्ता गर्ने र अनुसन्धान तथा मुद्दा शाखाका अधिकारीमार्फत वैदेशिक रोजगार न्यायाधीकरणको कार्यालयमा मुद्दा दर्ता गर्ने गरेको छ ।
प्रकाशित मिति: बुधबार, माघ २९, २०७६ ०५:३८
-1745656903.jpeg)