काठमाडौं– देशभरका स्थानीय तहहरुले वैदेशिक रोजगारीमा जान चाहने युवाहरुको व्यक्तिगत तथा पुनः श्रम स्वीकृतिको आवेदन लिने व्यवस्थालाई कार्यान्वयनमा ल्याउन थालेका छन् । सरकारले गत चैत १६ गते गरेको निर्णयबमोजिम यही वैशाख १ गतेदेखि स्थानीय तहबाटै व्यक्तिगत तथा पुनः श्रम स्वीकृतिसम्बन्धी आवेदन दिने व्यवस्था मिलाउन पत्राचार भएअनुसार कार्यान्वयनमा ल्याएका हुन् ।
विदेश जान चाहने नेपाली युवाहरुलाई नजिकैको स्थानबाट श्रम स्वीकृतिसम्बन्धी सेवा प्रवाह गर्ने उद्देश्यले स्थानीय तहको रोजगार सेवा केन्द्रबाट आवेदन दिनसक्ने व्यवस्था गरिएको हो ।
सरकारले यसअघि सातवटै प्रदेशबाट व्यक्तिगत तथा संस्थागत श्रम स्वीकृति दिने व्यवस्था गरिसकेको छ । विदेश जान चाहने नेपाली युवाहरुलाई नजिकैको स्थानबाट श्रम स्वीकृतिसम्बन्धी सेवा प्रवाह गर्ने उद्देश्यले स्थानीय तहको रोजगार सेवा केन्द्रबाट आवेदन दिनसक्ने व्यवस्था गरिएको हो । स्थानीय तहबाटै श्रम स्वीकृतिसम्बन्धी आवेदन संकलन कार्य सुरु गर्न थालिएको श्रम, रोजगार तथा सामाजिक सुरक्षा मन्त्रालयका उपसचिव एवं सहायक प्रवक्ता कविराज उप्रेतीले बताए ।
वैदेशिक रोजगारीलाई थप व्यवस्थित, सुरक्षित, मर्यादित, भरपर्दोे तथा श्रमिकमैत्री बनाउन स्थानीय तहबाट व्यक्तिगत श्रम स्वीकृति र पुनः श्रम स्वीकृतिका लागि आवेदन दिन पाउने व्यवस्था गरिएको उनले बताए । स्थानीय तहबाट श्रम स्वीकृति दिने नभई आवेदनमात्रै दिन पाइने उप्रेतीले प्रस्ट पारे ।
स्थानीय तहले श्रम स्वीकृतिसम्बन्धी आवेदन लिने व्यवस्था कार्यान्वयनमा ल्याएसँगै यसका लागि प्रदेशमा रहेका श्रम रोजगार कार्यालय वा काठमाडौंमा नै धाउनुपर्ने बाध्यता अन्त्य भएको मन्त्रालयको भनाइ छ । स्थानीय तहबाट श्रम स्वीकृतिसम्बन्धी व्यवस्था कार्यान्वयन धमाधम भइरहेको मन्त्रालयले जनाएको छ । देशभरका स्थानीय तहहरुले श्रम स्वीकृतिको आवेदन लिने कार्य सुरु गर्ने क्रम चलिरहेको छ ।
कोशी प्रदेशअन्तर्गत मोरङको मिक्लाजुङ गाउँपालिकाले रोजगार सेवा केन्द्रबाट श्रम स्वीकृति आवेदन दिने व्यवस्था लागू गरेपश्चात् उक्त गाउँपालिका–७ केशव सिग्देल पहिलो सेवाग्राही भएका छन् । आफ्नै ठाउँबाट सेवा लिन पाएपछि उनले खुसी हुँदै भने, ‘पहिला काठमाडौं र विराटगर गएर श्रमसम्बन्धी स्वीकृति लिनुपर्दा झन्झट हुन्थ्यो, लागत पनि बढी पथ्र्यो । अब गाउँपालिकाबाटै सेवा सुरु भएपछि सहज भएको छ ।’
मिक्लाजुङले वैदेशिक रोजगारीका लागि जानेहरूका लागि व्यक्तिगत श्रम स्वीकृति तथा पुनः श्रम स्वीकृतिको आवेदनसम्बन्धी सेवा यही वैशाख २ गतेदेखि प्रारम्भ गरेको हो । यस्तै उर्लाबारी नगरपालिकाले पनि श्रम स्वीकृतिको आवेदन दिने व्यवस्थालाई कार्यान्वयनमा ल्याएको नगरपालिकाका निमित्त प्रमुख प्रशासकीय अधिकृत मुरारीप्रसाद घिमिरेले बताए । नगरपालिकाले व्यक्तिगत श्रम स्वीकृति तथा पुनः श्रम स्वीकृतिसम्बन्धी सेवा यही वैशाख २ गतेदेखि दिन थालेको जानकारी दिए । वैदेशिक रोजगार ऐन तथा वैदेशिक रोजगार नियमावली, २०६४ मा भएको व्यवस्थाअनुसार रोजगारीका लागि जाने हरेक नेपाली श्रमिकले अनिवार्य श्रम स्वीकृति लिनुपर्ने व्यवस्था छ ।
