काठमाडौं– नेपाल लोकतान्त्रिक वैदेशिक रोजगार व्यवसायी फोरमका नवनिर्वाचित अध्यक्ष नरेन्द्र ढकालले वैदेशिक राजगार व्यवसायीजन्य संस्थाहरूलाई एक हन आह्वान गरेका छन् । दशौँ साधारणसभाबाट नवनिर्वाचित कार्यसमितिको पदभार ग्रहण कार्यक्रममा अध्यक्ष ढकालले विभिन्न राजनीतिक, भूगोल, जातीय संघसंस्थाहरू वैदेशिक राजगार व्यवसायको सवालमा एक स्थानमा आएर आफ्नो मुद्दालाई बलियो बनाउन एक हुन आग्रह गरे ।
अहिले वैदेशिक रोजगार व्यवसायमा भएका समस्याको सरकारी पक्षबाट सुनुवाइ नहुँदा व्यवसाय नै धरासायी हुन सक्नेसम्म सम्भावना बढेको उनले बताएका छन् । सरकारले व्यवसायी र कामदारमैत्री नीति, नियम कार्यान्यनमा नल्याउनुको मुख्य कारण व्यवसायीहरू मुख्यतया राजनीतिक दल, भूगोल, जातीय विभाजनमा बाँडिनु र व्यवसायीबीच सहमति हुन नसक्नु भएको उनले दाबी गरे ।
व्यावसाय बचाउनका लागि भए पनि आजबाट नै सम्पूर्ण विभाजित व्यवसायी एकीकृत भई छलफल गरी एक मत बनाएर दबाब दिई समस्याको समाधान खोज्ने कार्य थालनी गर्ने अध्यक्ष ढकालले बताए । जित र पराजितको कुरा बिर्सेर उप–विजेता भएकाले पराजयको तिक्तता त्यागी सहकार्य गरी सँगै अगाडि बढ्न पनि उनले आग्रह गरेका छन् ।
नेपाल लोकतान्त्रिक वैदेशिक रोजगार व्यवसायी फोरमको नवनिर्वाचित कार्यसमितिले संस्थाको नाम फोरमको सट्टा एसोसिएसन साथै कार्यसमितिमा तृतीय उपाध्यक्ष र सह–सचिव पद थप गरी १९ सदस्य कार्यसमिति रहने निर्णय गरेको पनि उनले जानकारी गराएका छन् । फोरमले विधान संशोधन समितिको गठन गरी छिट्टै विधान संशोधन गर्ने बताए ।
फोरमका निर्वाचित वरिष्ठ उपाध्यक्ष तारानाथ अर्यालले कार्यक्रममा बोल्दै २ वर्षको कार्यकालमा फोरमको शीर नझुक्ने गरी कार्यसम्पादन गर्ने बताएका छन् । कार्यसम्पादन गर्दै जाँदा कसैलाई काखा, कसैलाई पाखा नलगाउने बताए । फोरमभन्दा माथि संघ रहेकाले संघमार्फत नैैैैैै आफ्नो समस्याको समाधान गर्ने भएकाले संघसँग सहकार्य गरी अगाडि बढ्ने उनले बताएका छन् ।
निर्वाचित महासचिव भवानी निरौलाले कार्यक्रममा बोल्दै आफूहरूमाथि जिम्मेवारी थपिएको बताएका छन् । नेपाल वैदेशिक रोजगार व्यवसायी संघमा फोरमको सम्पूर्ण प्यानल नै निर्वाचित भएकाले आउँदो संघको निर्वाचनमा सम्पूर्ण प्यानल नै निर्वाचित गराउनु पर्ने जिम्मेवारी थपिएको उनले बताए । संघको आउँदो निर्वाचनमा पुनः सम्पूर्ण निर्वाचित हुनका निम्ति कम्तिमा ४ सय ५० सदस्य बनाउनु पर्नेमा विशेष जोड दिई अगाडि बढ्ने पनि बताएका छन् ।
कार्यक्रममा फोरमका पूर्वअध्यक्ष एवं संघका अध्यक्ष विष्णु गैरेले निर्वाचित सम्पूर्ण कार्यसमितिलाई बधाइ दिँदै फोरमसँग संघ सहकार्य गर्न तयार रहेको बताएका छन् । वैदेशिक रोजगार ऐन र नियमावलीमा भएका समस्याको समाधानका निम्ति मन्त्रालयमा छलफल गरिरहेको उनले बताए । यस विषयमा छिट्टै समाधान निस्किने उनले बताएका छन् ।
प्रकाशित मिति: सोमबार, माघ २७, २०७६ ०५:३५
-1752335779.jpg)
