-
- मलेसिया पहिलोस्थानमा कायमै
- पाँच हजार १३५ जना महिला
काठमाडौं– चालु आर्थिक वर्षको नवौं महिना अर्थात् चैतमा वैदेशिक रोजगारीमा जानका लागि ६१ हजारभन्दा बढीले श्रम स्वीकृति लिएका छन् । वैदेशिक रोजगार विभागले सार्वजनिक गरेको विवरणअनुसार चैतमा ६१ हजार ४७८ जनाले नयाँ तथा पुनः श्रम स्वीकृति लिएका हुन् ।
यो संख्या फागुनको भन्दा न्यून हो । फागुनमा ६१ हजार ८४५ जनाले विदेश जान श्रम स्वीकृति लिएका थिए । यसभन्दा अघिल्लो महिना माघमा यस्तो संख्या ६४ हजार २८४ थियो । पुस महिनामा ६५ हजार ४६४ जना र मंसिरमा ६८ हजारभन्दा बढीले श्रम स्वीकृति लिएको तथ्यांक छ । सरसर्ती हेर्दा गत आर्थिक वर्षबाट पुरानै लयमा फर्किएको वैदेशिक रोजगारीको यात्रा चालु आवको मंसिरबाट खस्किँदै गएको विभागको तथ्यांकले देखाएको छ ।
चालु आवको सुरुआतदेखि नै पहिलो गन्तव्य बनेको मलेसिया जाने नेपाली कामदारहरुको संख्या पनि खस्किँदै गएको तथ्यांक छ । चैत महिनामा १६ हजार २६५ जनाले मलेसिया जान श्रम स्वीकृति लिएका छन् । गत फागुनको तुलनामा चैतमा मलेसियाका लागि श्रम स्वीकृति लिनेको संख्या तीन हजार ५५९ ले कम हो । अघिल्ला महिनाहरुको तुलनामा मलेसिया जाने संख्या घट्दो क्रममा छ । यद्यपि, विभागले दिएको श्रम स्वीकृतिको आधारमा अझै पनि मलेसिया नेपालीहरुको पहिलो गन्तव्य नै रहेको छ । मलेसियाले नेपाली कामदारलाई प्राथमिकता दिँदै आएको छ । जसअनुसार नेपालबाट अधिक कामदार आपूर्ति गर्ने नीति लिएको छ ।
यसैगरी चैत महिनामा रोजगारीका लागि कतार जान ११ हजार २४९ जनाले श्रम स्वीकृति लिएका छन् । कतार जाने नेपालीहरुको संख्यामा पनि क्रमिकरुपमा गिरावट आएको छ । विभागको तथ्यांकअनुसार कतार जान गत फागुन महिनामा ११ हजार ३०३, माघ महिनामा १२ हजार ७०४ र पुस महिनामा १३ हजार ६६ जनाले श्रम स्वीकृति लिएका थिए ।
यस्तै चैत महिनामा साउदी अरेबियाका लागि ११ हजार ३६४, संयुक्त अरब इमिरेट्स (युएई) १० हजार १९३ र कुवेतका लागि दुई हजार ७९४ जनाले श्रम स्वीकृति लिएको विभागले जनाएको छ । साउदी र कुवेत जाने नेपालीको संख्यामा अघिल्लो महिनाको भन्दा बढेको छ । उल्लिखित यी पाँच देशमा जाने नेपाली श्रमिकको संख्याले वैदेशिक रोजगारको ठूलो हिस्सा ओगटेको विभागको तथ्यांकले देखाएको छ ।
त्यस्तै रोमानियामा एक हजार ५७८, जापानमा ९२८, बहराइनमा ६७४, क्रोएसियामा ५४०, पोल्याण्ड ४७८, साइप्रसमा ४४४, ओमानमा ४५३, माल्दिभ्समा ३११ र माल्टामा २२० जना श्रम स्वीकृति लिएर रोजगारीका लागि गएका छन् । चैतमा इपिएस प्रणालीमार्फत दक्षिण कोरिया जाने नेपालीको संख्या दुई हजार ३२३ रहेको विभागले जनाएको छ ।
विभागबाट कूल श्रम स्वीकृति लिनेमध्ये पुनः श्रम स्वीकृति लिने २५ हजार ४०० जना छन् भने पहिलोपटक विदेश जान श्रम स्वीकृति लिनेको संख्या ३६ हजार ७८ जना रहेका छन् । चैतमा श्रम स्वीकृति लिनेमध्ये पाँच हजार १३५ जना महिला रहेको विभागले उल्लेख गरेको छ ।
विभागले सार्वजनिक गरेको तथ्यांकअनुसार जिल्लागतरुपमा धनुषाबाट सबैभन्दा बढी रोजगारीका लागि श्रम स्वीकृति लिएको देखिन्छ भने झापा दोस्रो स्थानमा रहेको छ । यस्तै सिरहा र महोत्तरी क्रमशः तेस्रो र चौथो स्थानमा छन् । मोरङ पाँचौं स्थानमा रहेको छ । सर्लाही, सुनसरी, सप्तरी, नवलपरासी पूर्व, रौतहट, स्याङजा, तनहुँ, दाङ, चितवन, बारा, बागलुङ, पर्साबाट पनि विदेश जानेको संख्या उच्च रहेको छ । रुपन्देही, तनहुँ, कपिलवस्तु, मकवानपुर, डडेलधुराबाट पनि उल्लेख्य मात्रामा नेपालीहरु विदेश गएको विभागले जनाएको छ ।
चालु आर्थिक वर्षको सुरुआतदेखि नै रोजगारीका लागि विदेशिने नेपालीको संख्यामा वृद्धि हुँदा यो नौ महिनाको अवधिमा छ लाख ३४ हजार जनाले श्रम स्वीकृति लिएको विभागले जनाएको छ । यस अवधिमा सबैभन्दा बढी कात्तिक महिनामा ७८ हजारभन्दा बढीले श्रम स्वीकृति लिएको तथ्यांक छ ।
