काठमाडौं– नेपाल लोकतान्त्रिक वैदेशिक रोजगार व्यवसायी फोरमको कार्यसमितिमा सहमतिको सम्भावना कम हुँदै गएको छ । फोरमको शुक्रबार हुने कार्यसमिति चयनसहितको दशौँ साधारणसभामा नेतृत्वमा पुग्ने आकांक्षीहरू बढ्दै गएपछि सहमतिको सम्भावना कम हुँदै गएको हो ।
सहमति कायम गर्न नेपाली कांग्रेसले केन्द्रबाट केन्द्रीय सदस्य रमेश लेखकलाई पठाएको थियो । उनले बुधबार दिनभर सहमतिको प्रयास गरेका थिए तर सहमतिमा पुग्ने वातावरण भने बनेन । व्यावसायीहरूले सहमतिभन्दा पनि आफ्नो दाबी मात्र पेस गरेपछि बैठकमा सहमति हुन नसकेको बैठकमा सहभागी एक सदस्यले प्रभाव दैनिकसँग बताए ।
अहिले फोरम नेतृत्वको अध्यक्षको आकांक्षीमा ५ जनाको नाम चर्चामा आएको छ । जसमा पूर्ववरिष्ठ उपाध्यक्ष नरेन्द्र ढकाल, नेपाल वैदेशिक रोजगार संघका पूर्वद्वितीय उपाध्यक्ष भुवनसिंह गुरुङ, पूर्ववरिष्ठ उपाध्यक्ष ऋषिप्रसाद शर्मा, सल्लाहकार सीता देवाकोटा र देवीप्रसाद काफ्लेले आकांक्षा व्यक्त गरेका छन् ।
त्यस्तै ,फोरमको नेतृत्वको वरिष्ठ उपाध्यक्षमा तारानाथ अर्याल, रमेश राई र थीरमणि पौडेल चर्चामा छन् भने द्वितीय उपाध्यक्षमा प्रकाश खड्का र नारायण पराजुली रहेको बताइन्छ । साथै महासचिवमा भवानी निरौला, कृष्णकुमार जैसी र चिरञ्जिवी बस्यालको नाम चर्चामा रहेको छ भने सचिवमा कमल काफ्ले, प्रकाश बोहरा र सञ्जय पनेरुले इच्छा देखाएका छन् ।
यता, फोरमका महासचिव तारानाथ अर्यालका अनुसार फोरमको निर्वाचनमा अहिलेसम्म सदस्यता नवीकरण गर्ने तथा नयाँ सदस्यता लिनेको संख्या २०० भन्दा माथि पुगेको छ । जसले गर्दा अब निर्वाचन समिति गठन गरेर सहमति भएमा सहमतिबाट र नभएमा निर्वाचनबाट नयाँ कार्यसमित आउने उनले बताए । साथै विगतका वर्षहरू भन्दा फरक तरिकाले दुई हजार लेभी बुझाएर साधारण सदस्यहरूले निर्वाचनमा मतदान गर्न पाउने भएकाले यसपटक सदस्यता नवीरकण नभई फोरमको साधारण सदस्य भएकै आधारमा मतदान गर्न नपाइने महासचिव अर्यालले बताए ।
फोरमको विधानअनुसार अध्यक्ष, वरिष्ठ उपाध्यक्ष, उपाध्यक्ष, महासचिव, सचिव, कोषाध्यक्ष, सहकोषाध्यक्षसहित ७ पदाधिकारी र १४ जना कार्यकारी सदस्यहरूसहित २१ सदस्यीय कार्यसमिति रहने व्यवस्था छ । तर कार्यसमितिका ७ पदाधिकारी र दश सदस्यसहित १७ जनाको मात्र निर्वाचन हुन्छ । बाँकी ४ जना कार्यसमिति सदस्य अध्यक्षले मनोनयन गर्ने व्यवस्था रहेको छ ।
