काठमाडौं– वैदेशिक रोजगार विभागको महानिर्देशकमा कुमार दाहाल नियुक्त भएका छन् । सरकारले विभागका महानिर्देशक डा.भीष्मकुमार भुषाललाई अख्तियार दुरूपयोग अनुसन्धान आयोगमा सरुवा गरेपछि उनको स्थानमा दाहाललाई नियुक्त गरेको हो ।
यसअघि दाहाल राष्ट्रिय सूचना आयोगमा सहसचिव रहेका थिए । अहिले उनको काँधमा निर्वतमान महानिर्देशक डा.भुषालले सुरु गरेका सुधारात्मक कामलाई निरन्तरता दिनुपर्ने जिम्मेवारी आएको छ । यसअघि १० महिनाको अवधिमा महानिर्देशक डा.भुषालले वैदेशिक रोजगारको क्षेत्रलाई व्यवस्थित, मर्यादित एवं सुरक्षित बनाउन अनलाइन प्रणालीलगायत थुप्रै काममा जोड दिएका थिए ।
त्यस्तै ,उनको कार्यअवधिमा विभागले छोटो अवधिमै अनलाइन टोकन, श्रम स्विकृतिको जानकारी मोबाइल मेसेजिङ सेवाबाट प्रदान गर्ने, पुरानो कागजमा छापिने श्रम स्टिकरको साटो बारकोडमा आधारित श्रम स्विकृतिको निस्सा श्रमिकको इमेल मै जाने व्यवस्था, अनलाइन कागजात प्रमाणीकरण, अनलाइन आवेदन प्रणाली, अनलाइन बिमा र कल्याणकारी कोषको रकम भुक्तानी, अनलाइन पूर्वस्विकृति, अनलाइन छनोट सूची प्रकाशन र अनलाइन अन्तिम श्रम स्विकृतिको व्यवस्था गरिसकेको छ ।
