दोहा– साउदी सरकारले ल्याएको पछिल्लो बहिर्गमनको व्यवस्था अनुरूप नेपाल फर्किन चाहने नेपालीहरूका लागि फारम तथा कागजात संकलन गर्न साउदीस्थित नेपाली दूताबासले सहयोग गर्ने भएको छ ।
साउदी सरकारले साउदीमा रोजगारीमा रही विविध कारणले अकामा नबनेका वा अकामा नवीकरण नगरेका वा नभएका, कम्पनी छाडी भागेका, सार्वजनिक सजाय नपाएका वा सजाय भुक्तानी गरिसकेका विदेशी कामदारहरूका लागि बहिर्गमनको व्यवस्था गरेको छ ।
साउदी सरकारले ल्याएको यो बहिर्गमन योजनाअन्तर्गत स्वदेश फर्कन चाहने नेपालीहरूलाई स्वदेश फर्कन आवश्यक पर्ने फारम र कागजातहरू राखी पत्रसहित सम्बन्धित श्रम कार्यलयमा जानका लागि नेपाली दूताबासले आगामी फेब्रुअरी १४ र १५ मा अलकुरियात र अल जोफ सकाका क्षेत्रमा कर्मचारीहरू खटाई फारम र निवेदन संकलन गर्ने जनाएको छ ।
तोकिएको स्थानमा उपस्थित भई फारम भरेर बहिर्गमन व्यवस्थाको फाइदा लिई स्वदेश फर्किन दूताबासले अनुरोध गर्दै कुनै समस्या भएमा सम्पर्क व्यक्तिका रूपमा वीरकुमार राय (तृतीय सचिव) लाई कल गर्न सकिने दूताबासले जनाएको छ ।
तोकिएको स्वरूपको निवेदन (निवेदनको ढाँचा कार्यक्रम स्थलमा रहनेछ), अकामाको प्रतिलिपि ३ प्रति र राहदानी र भिसाको प्रतिलिपी ३ प्रति आवश्यक पर्ने दुतावासले जनाएको छ । कम्पनी छाडेर भागेकाहरूले बिगतमा जस्तो जेल बसेर स्वदेश फर्किनु पर्नेमा यो नयाँ नियम बमोजिम जेल नबसी स्वदेश फर्कन सकिने दूताबासले जनाएको छ ।
साउदी सरकारले अबैधानिक रूपमा रहेकाहरूलाई सहज स्वदेश फिर्तिका लागि बिगत २०१३ र २०१७ मा आममाफीको घोषणा गरेको थियो ।
