काठमाडौं– वैदेशिक रोजगारीका लागि साउदी अरेबिया पुगी विभिन्न कारणले जेल परेका नेपालीमध्ये अधिकांश मदिरा ओसारपसार (कारोबार) गर्ने रहेको बताइएको छ । रियादस्थित नेपाली दूतावासले आफ्नो आधिकारिक फेसबुक पेजमार्फत लाइभ जानकारी दिँदै अधिकांश नेपालीहरु मदिरा ओसारपसारको अभियोगमा जेल परेको उल्लेख गरेको छ ।
दूतावासले साउदीको सेन्ट्रल जेलमा रहेका नेपालीहरुको संख्यालाई आधार मान्दै जेल परेकामध्ये अधिकांशलाई मदिरा कारोबारमा संलग्न रहेको अभियोग लागेको जनाएको छ । दूतावासले हालै सञ्चालनमा ल्याएका विभिन्न अनलाइन प्रणालीको बारेमा जानकारी दिने क्रममा श्रम काउन्सिलर देवेन्द्र कार्कीले साउदीको सेन्ट्रल जेल निरीक्षण गर्दा झण्डै १५० नेपालीहरु बन्दी रहेका र त्यसको ८० प्रतिशत मदिरा ओसारपसार र खरिद बिक्रीमा संलग्न भएको अभियोगमा जेल परेको बताए ।
नेपालीहरु मदिरा कारोबारको अभियोगमा जेल पर्नु दुःखद रहेको भन्दै कार्कीले गैरकानुनी क्रियाकलापमा संलग्न नहुन र साउदीको कानुनबारे जानकारी राख्नुपर्ने बताए । साउदी कानुनमा मदिरा उत्पादन, सेवन र बिक्री बितरण गर्नु अपराध मानिएको भन्दै कार्कीले यस्तो गतिविधिमा संलग्नलाई जेल सजायसहित ठूलो रकम जरिवाना हुने हुँदा सचेत रहन उनले आग्रह गरे । कार्कीका अनुसार मदिरा बिक्रीवितरणको मात्राका आधारमा छ महिनादेखि वर्षौंसम्म जेल सजाय र जरिवाना भुक्तान गर्नुपर्छ ।
उनले जेलमा पुगेर नेपालीहरुलाई भेट्दा चिनजानकै मान्छेबाट अर्थात् नेपालीहरुबाटै उल्लिखित कार्यमा लगाई जेलसम्म पुग्नुपरेको र ठगिएको गुनासो गरेको बताए । ‘जेलमा गएर जति नेपालीलाई भेटियो उहाँहरु सबैले चिनेकै साथीभाइ र नेपालीले अह्राएर गरेको कामले जेल सजाय भोग्नुपरेको बताउनुभयो,’ कार्कीले भने, ‘कानुन थाहा नभएका, भर्खर साउदी आएका नेपाली आफंै पनि सचेत रहन र आफ्नै दाजुभाइलाई फसाउने घृणित कार्य नगर्न आग्रह छ ।’
केही नेपालीले धेरै नेपालीलाई दुःख दिइरहेको र यसबारे दूतावासले पनि निगरानी गरिरहेको कार्कीले जानकारी दिए । ‘यस्ता क्रियाकलापमा संलग्न हुनेहरुका बारेमा दूतावासलाई जानकारी दिनुहोला, बढी पैसा कमाउने प्रलोभनमा परेर आफ्नो जिन्दगी खराब नगर्नूस्,’ उनले भने, ‘जे कामका लागि आउनुभएको हो त्यही काम गर्नुस् र नेपाली भएर दुःख गर्न आएको अर्को नेपालीलाई ठगेर लाभ लिने कल्पना नगर्नूस् ।’
क्षणमै पैसा कमाउने र धनी हुने लोभमा परेर कतिपय नेपालीहरु गैरकानुनी कार्यमा संलग्न रहेको पाइएको भन्दै कार्कीले आफ्नो महŒवाकांक्षा त्याग्न र त्यस्तो धन्दामा नलाग्न आग्रह गरे । त्यस्तै काम गर्ने सिलसिलामा धेरै तलब पाइने आशामा कसैले कम्पनी छोड्छ वा भाग्छ भने त्यो पनि गैरकानुनी हुने जनाउँदै त्यस्तो कार्य गर्न नेपाली, बंगाली वा अन्य कसैले लोभ देखाएमा पनि सचेत हुनुपर्ने उनको भनाइ छ । कम्पनी छाडेमा ठूलो जरिवानामा पर्ने र स्वदेश फिर्तीमासमेत समस्या हुने उनले बताए । तसर्थ साउदी आउनुपूर्व सम्पूर्ण जानकारी लिएर मात्र आउन कार्कीले आग्रह गरे ।
