काठमाडौं– नेपाल लोकतान्त्रिक वैदेशिक रोजगार व्यवसायी फोरमको दशौँ साधारणसभामा भाग लिन आफ्नो सदस्यता नवीकरण गर्ने तथा नयाँ सदस्यता लिने म्याद सकिएको छ । यहि २४ माघमा हुने फोरमको दशौँ साधारणसभा लागि विगतका वर्षहरू भन्दा फरक तरिकाले दुई हजार लेभी बुझाएर साधारण सदस्यहरूलाई निर्वाचनमा मतदान गर्ने उद्देश्यले दिएको म्याद आइतबार सकिएको हो ।
फोरमका महासचिव तारानाथ अर्यालका अनुसार फोरमको निर्वाचनमा आइबारसम्म भाग लिन आफ्नो सदस्यता नवीकरण गर्ने तथा नयाँ सदस्यता लिनेको संख्या करिब २०० पुगेको छ । जसले गर्दा अब केही दिनमा नै निर्वाचन समिति गठन गरेर सहमति भएमा सहमतिबाट र नभएमा निर्वाचनबाट नयाँ कार्यसमित आउने महासचिव अर्यालले बताए । उनका अनुसार यसपटक सदस्यता नवीरकण नभए फोरमको साधारण सदस्य भएकै आधारमा मतदान गर्न पाइने छैन ।
यसपटक फोरम नेतृत्वको प्रतिस्पर्धामा आकांक्षीहरूको सक्रियता अनपेक्षित रूपमा बढिरहेको छ । नेपाली कांग्रेसको शुभचिन्तक संगठन भएकाले लोकतान्त्रिक प्रक्रियामा नेतृत्वमा दाबी गर्नु कुनै नौलो नभएको महासचिव अर्यालले बताएका छन् । ऐतिहासिक पार्टीको शुभचिन्तक संगठन भएकाले फोरमको नेतृत्वमा पुग्नु आफैँ पनि गहकिलो विषय भएको बताए ।
तर, नेतृत्व चयनका लागि मतदान प्रक्रियामा नै पुग्नुपर्ने स्थिति नआओस् भन्ने पक्षमा उनी देखिन्छन् । सहमतिमा नै नेतृत्व चयन भयो भने यसले संस्थाको गरिमा अरु बढ्ने उनले बताए । तर, नेतृत्वमा जति धेरैले प्रतिस्पर्धाका लागि आफूलाई अघि सार्नु लोकतान्त्रिक व्यवस्थामा अत्यन्तै खुसीको कुरा भएको उनले बताएका छन् । केही दिनयता उनको नाम पनि अध्यक्षका दाबेदारका रूपमा अघि सारिएकोप्रति भने उनले अनभिज्ञता प्रकट गरेका छन् । त्यसो भए तपाई फोरमको कुन पदको आकांक्षी हुनुहुन्छ ? भन्ने प्रभावको प्रश्नको उत्तरमा महासचिव अर्यालले भने, ‘बजारमा आएको भनाइ मेरो आधिकारिक भनाइ होइन, चार जना व्यावसायी मभन्दा सिनियर हुनुहुन्छ, म पार्टीको स्कुलिङबाट आएको हुनाले पनि आफूभन्दा सिनियरलाई सम्मान गर्नुपर्ने हुन्छ । फोरमको दुई कार्यकाल महासचिवको भूमिका निर्वाह गरिसकेकाले स्वतः प्रथम उपाध्यक्षमा मेरो दाबी रहन्छ,’ उनले अगाडि भने, ‘राजनीतिक संस्कारलाई जोगाउनका लागि पनि मैले सिनियरलाई सम्मान गर्नुपर्ने हुन्छ ।’
प्रकाशित मिति: सोमबार, माघ २०, २०७६ ०६:५१
-1752335779.jpg)
