काठमाडौं – प्रदेश सरकारले प्रदेश न. २ मा वैदेशिक रोजगारीमा जाने युवाहरूलाई बिनाधितो सहुलियत वैदेशिक रोजगार कर्जा दिएको छ । प्रदेश सरकारले वैदेशिक रोजगारमा जानेका लागि बिनाधितो ऋण उपलब्ध गराउनका लागि विभिन्न बैंकसँग सम्झौता गरेको हो । भिसा लागेपछि भिसासहित श्रम सम्झौता बंैकमा जम्मा गरेको पाँच दिनभित्रै कर्जा उपलब्ध गराउने प्रदेश सरकार र बैंकबीच सहमति भएको हो ।
संघीय सरकारले स्वदेशमा रोजगार सिर्जना गर्ने दाबी गर्दै आइरहे पनि विभिन्न रूपबाट वैदेशिक रोजगारीलाई नै प्रवद्र्धन गर्ने कार्यक्रम आइरहेको देखिएको छ । संघीय सरकारले स्वदेशमा रोजगारी सिर्जना गर्ने भन्दै प्रधानमन्त्री रोजगार कार्यक्रम, वर्षभरिका लागि ६० दिनेजस्ता विभिन्न कार्यक्रम सन्चालन गर्दै आएको छ । प्रदेश सरकारले वैदेशिक रोजगारीमा जानका लागि ऋण उपलब्ध गराउने कार्यक्रमले स्वदेशमा आत्मनिर्भरतातिर लाग्नेभन्दा पनि पुनः वैदेशिक रोजगारीमा जाने प्रवृत्ति नै मौलाउन सहयोग पुग्ने विज्ञहरूको भनाइ छ ।
वैदेशिक रोजगारीमा जानका लागि ऋण दिनुभन्दा पनि सीप विकास गरेर स्वदेशमा स्वरोजगार बन्ने वा विदेशै गएपनि उच्च तहको काममा जान योग्य बनाउने वातावरण तयार गर्नुपर्नेमा विज्ञहरूको जोड छ । प्रदेश सरकारले भने वैदेशिक रोजगार कर्जाको व्यवस्था मिलाएसँगै विदेश जानकै निम्ति चर्को व्याजमा ऋण लिने युवाहरूको बाध्यता हट्ने दाबी गरेको छ ।
प्रदेश सरकारको समन्वयमा दुई वटा बैंकले बिनाधितो सहुलियत ऋण दिने भएको हो । प्रभु बैंकले सो सेवा सप्तरी, सर्लाही, रौतहट, बारा र पर्सामा वैदेशिक रोजगारमा जाने युवालाई उपलब्ध गराउने, सिरहा, धनुषा र महोत्तरीमा एसबिआई बैंकले सेवा दिने जनाइएको छ ।
