दोहा– साउदीस्थित नेपाली दूताबासले साउदी सरकारले ल्याएको पछिल्लो बहिर्गमनको व्यवस्थाअनुरूप नेपाल फर्किन चाहने नेपालीहरूका लागि फाराम तथा कागजात संकलन गर्न सहयोग गर्ने भएको छ । साउदीमा रोजगारीमा रही विविध कारणले (अकामा) नबनेका वा अकामा नवीकरण नगरेका वा नभएका, कम्पनी छोडी भागेका, सार्वजनिक सजाय नपाएका वा सजाय भुक्तानी गरिसकेका कामदारहरूका लागि बहिर्गमनको व्यवस्था गरेको दूताबासले जनाएको छ ।
साउदी सरकारले ल्याएको बहिर्गमन योजनाअन्तर्गत स्वदेश फर्कन चाहने नेपालीहरूलाई आवश्यक पर्ने फारम र कागजातहरू राखी पत्रसहित सम्बन्धित श्रम कार्यालयमा जानका लागि नेपाली दूताबासले विभिन्न स्थानमा कर्मचारीहरू खटाई फाराम र निवेदन संकलनको कार्यलाई तीव्रता दिएको जनाएको छ ।
तोकिएको स्थानमा उपस्थित भई फारम भरेर बहिर्गमन व्यवस्थाको फाइदा लिई स्वदेश फर्किन अनुरोध गर्दै कुनै पनि समस्या भएमा दूताबासमा सम्पर्क गर्न अनुरोध गरिएको जनाएको छ । निवेदनको अकामाको प्रतिलिपि– तीनप्रति, राहदानी र भिसाको प्रतिलिपि ३ प्रति आवश्यक पर्ने दूताबासले जनाएको छ । कम्पनी छाडेर भागेकाहरूले बिगतमा जस्तो जेल बसेर स्वदेश फर्किनु पर्नेमा यो नयाँ नियम बमोजिम जेल नबसी स्वदेश फर्कन सकिने दूताबासले जनाएको छ । यता, कतारस्थित नेपाली दूताबासले कतारमा रहेका नेपालीहरूलाई आफ्नो राष्ट्रिय ठेगाना दर्तामा सहयोग गर्न अनुरोध गरेको छ । कतार सरकारले कतारमा बसोबास गर्ने सम्पूर्ण कतारी नागरिक, विदेशी नागरिक तथा वैधानिक व्यक्तिहरूले अनिवार्य रूपमा निजहरूको राष्ट्रिय ठेगाना दर्ता गर्नुपर्ने नयाँ व्यवस्था गरेअनुरूप आग्रह गरिएको दूताबासले जनाएको छ ।
आफ्नो राष्ट्रिय ठेगाना दर्ता गर्न सूचित गर्न कतारको आन्तरिक मामिला मन्त्रालयले नेपाली दूताबासलाई पत्राचार गरेको थियो ।
प्रकाशित मिति: शुक्रबार, माघ १७, २०७६ ०५:१७
-1752335779.jpg)
