काठमाडौं– वैदेशिक रोजगारीमा जान श्रम स्वीकृति लिनेको संख्या घट्दै गएको छ । वैदेशिक रोजगार विभागले सार्वजनिक गरेको माघ महिनाको विवरणमा श्रम स्वीकृति लिनेको संख्या अघिल्लो महिनाको तुलनामा घटेको पाइएको हो ।
माघ महिनामा विभिन्न मुलुक जानका लागि ६४ हजार २८४ जनाले अन्तिम श्रम स्वीकृति लिएको विभागले जनाएको छ । यो सँगै चालु आर्थिक वर्षको सात महिनामा वैदेशिक रोजगारीका लागि श्रम स्वीकृति लिनेको संख्या चार लाख ८० हजार नाघेको छ । तर, माघ महिनामा श्रम स्वीकृति लिनेको संख्या अघिल्लो महिना (पुस)को भन्दा एक हजार १८० ले न्यून हो । पुसमा ६५ हजार ४६४ जनाले श्रम स्वीकृति लिएका थिए । यसअघि मंसिरमा यस्तो संख्या ६८ हजारभन्दा बढी थियो । माघ महिनामा श्रम स्वीकृति लिनेमध्ये पाँच हजार ८३७ जना महिला रहेको विभागले उल्लेख गरेको छ ।
गत आर्थिक वर्षबाट पुरानै लयमा फर्किंदै बढोत्तरी भइरहेको वैदेशिक रोजगारीको यात्रा पुस महिनादेखि घट्न थालेको विभागको तथ्यांकमा देखिन्छ । त्यसअघिका महिनाहरुमा भने श्रम स्वीकृति लिनेको संख्या बढ्दै आएको थियो । चालु आर्थिक वर्षको सात महिनामध्ये कत्तिकमा सबैभन्दा धेरै ७८ हजारभन्दा बढीले श्रम स्वीकृति लिएको तथ्यांक छ ।
चालु आर्थिक वर्षको सुरुआतदेखि नै पहिलो गन्तव्य बनेको मलेसिया जाने नेपाली कामदारहरुको संख्यामासमेत पछिल्लो महिना गिरावट आएको छ । माघमा १९ हजार ७८३ जनाले मलेसिया जान श्रम स्वीकृति लिएको विभागले जनाएको छ । यसअघि पुसमा २० हजार ३३९ र मंसिरमा ३० हजार ५४० जनाले मलेसिया जना श्रम स्वीकृति लिएका थिए । यद्यपि, श्रम स्वीकृतिको आधारमा यतिखेर रोजगारीका लागि अन्य मुलुकभन्दा मलेसिया नेपालीको रोजाइमा परेको विभागको तथ्यांकले देखाएको छ ।
गत आवमा नेपालीहरुका लागि पाँचौं श्रम गन्तव्य बन्न पुगेको मलेसिया चालु आवमा पहिलो स्थानमा रहेको छ । आप्रवासी कामदारको चरम संकट झेलिरहेको मलेसियाले नेपालबाट अधिक कामदार लैजाने रणनीतिसमेत अपनाएको छ । यसै सिलसिलामा मलेसियाका गृहमन्त्री सैफुद्धिन नासुसन इस्माइलले नेपालको तीन दिने भ्रमणमा नेपाली कामदार आपूर्तिका लागि उच्चस्तरीय छलफल गरेका थिए ।
माघ महिनामा कतार जान १२ हजार ७०४ जनाले श्रम स्वीकृति लिएका छन् । जहाँ गत पुस महिनामा १३ हजार ६६ जनाले श्रम स्वीकृति लिएका थिए । यसैगरी संयुक्त अरब इमिरेट्स (युएई)मा जान नौ हजार ७७०, साउदी अरेबिया १० हजार ५७६ र कुवेत जानका लागि दुई हजार ९९२ जनाले श्रम स्वीकृति लिएको विभागले जनाएको छ । यी पाँच मुलुकले नै नेपालबाट वैदेशिक रोजगारीका लागि जानेको ठूलो हिस्सा ओगटेको विभागको तथ्यांकले देखाएको छ ।
यसैगरी माघ महिनामा श्रम स्वीकृति लिनेमा जापानका लागि ८८२, रोमानिया ८०४, बहराइन ७७१, पोल्याण्ड ७०२, क्रोएसिया ४७१, साइप्रस ४१७, ओमान ४०६ र माल्टाका लागि २७० जना रहेका छन् । श्रम स्वीकृति लिएर युरोपेली मुलुक जाने नेपालीको संख्या भने निकै घटेको विभागको तथ्यांकले देखाउँछ ।
यस्तै इपिएस प्रणालीबाहेक श्रम स्वीकृति लिएर दक्षिण कोरिया जाने नेपालीको संख्या एक हजार ७९७ रहेको छ । कूल श्रम स्वीकृति लिनेमध्ये पुनः श्रम स्वीकृति लिने २५ हजार १६० जना छन् भने पहिलोपटक विदेश जान श्रम स्वीकृति लिनेको संख्या ३९ हजार १२४ रहेको छ ।
जिल्लागतरुपमा मधेसका जिल्लाबाट सबैभन्दा बढी रोजगारीका लागि श्रम स्वीकृति लिएको देखिन्छ । मधेसका जिल्लाहरु धनुषा, सिरहा, महोत्तरी, सर्लाही, बारा, रौतहट, पर्सा र सप्तरीबाट विदेश जानेको संख्या ठूलो रहेको छ । त्यसैगरी झापा, मोरङ, सुनसरी, रुपन्देही, तनहुँ, धादिङ, कपिलवस्तु, मकवानपुर दाङ, स्याङ्जा र नवलपरासी पूर्वबाट पनि उल्लेख्य मात्रामा नेपालीहरु विदेश गएको विभागले जनाएको छ ।
