काठमाडौं– वैदेशिक रोजगारमा गएको व्यक्तिहरूको श्रम स्विकृतिको विवरण त्रिभुवन अन्तर्राष्ट्रिय विमानस्थलस्थित अध्यागमन कार्यालयले आफैँ हेर्न सक्ने भएको छ । यसअघि सबै काम श्रम डेस्कबाट हुँदै आए पनि मंगलबार अध्यागमन विभागसँग वैदेशिक रोजगार विभागको सूचना प्रणालीहरू एकीकरण भएपछि श्रम स्विकृतिको बिवरण आफैँ हेर्न सकिने भएको हो ।
विभागका महानिर्देशक डा.भीष्मकुमार भुषालका अनुसार वैदेशिक रोजगार विभागले अध्यागमन विभागसँग डाटा सेयरिङ र इन्टिग्रेसन गरेपछि अब कुनै व्यक्ति नेपालको अध्यागमनबाट जुनसुकै प्रयोजनका लागि बाहिर गए पनि आए पनि तथ्यांक हुनेछ । यसबाट कुनै व्यक्तिले हिजोका दिनमा कुन कुन भिसामा बाहिर गएको हो हेर्न र अपराध नियन्त्रण गर्नसमेत सहयोग पुग्नुका साथै कति नेपाली भारतबाहेकका देशमा गएका छन् भन्ने वास्तविक सूचना संकलन हुने उनले बताए ।
तर, यसअघि वैदेशिक रोजगारीमा जाने नेपालीको संख्याको वास्तविक तथ्यांक नभएको महानिर्देशक डा.भुषालले बताएका छन् । उनका अनुसार सन् २००० को अप्रिल २९ देखि हालसम्म करिब ६३ लाख श्रम स्विकृति जारी भएको छ । यसको अर्थ ६३ लाख नेपाली वैदेशिक रोजगारीमा छन् भन्ने होइन, यसमा एउटै व्यक्तिले पटकपटक लिएको श्रम स्विकृतिको गणना हुने हुँदा विदेशिएकाहरूको तथ्यांक एकीन नभएको उनी बताउँछन् ।
त्यस्तै, यता भिजिट भिसा, बिजनेस भिसा, विद्यार्थी भिसा, आश्रित भिसाका साथै रोजगारीमा भारत जानेको पनि वास्तविक तथ्यांक नभएको उनले बताएका छन् । त्यसका साथै अहिले विदेशमा ४५ लाख नेपाली कार्यरत छन् भन्ने कुरा पनि तथ्यांक नभएर मिथ्यांक मात्र भएको डा.भुषालले जानकारी दिएका छन् ।
यसअघि वैदेशिक रोजगार विभागले २० असार ०७६ मा अध्यागमनसँग सूचना प्रणालीको एकीकरण गर्न प्राविधिक तयारी पूरा गरेर पत्रचार गरे पनि मंगलबारबाट नेपाली पोर्टलको शुभारम्भसँगै उक्त प्रणालीमा जोडिएको महानिर्देशक डा.भुषालले जानकारी दिएका छन् । जसले गर्दा अब वैदेशिक रोजगार विभागको श्रम डेस्कबाट हेरिने र परीक्षण गरिने कागजातहरू अध्यागमन विभागको नेपाली पोर्टलबाटै परीक्षण गर्न सकिने उनले बताए ।
त्यति मात्र होइन, विभागले छोटो समयमै अनलाइन टोकन, श्रम स्विकृतिको जानकारी मोबाइल मेसेजिङ सेवाबाट प्रदान गर्ने, पुरानो कागजमा छापिने श्रम स्टिकरको साटो बारकोडमा आधारित श्रम स्विकृतिको निस्सा ,श्रमिकको इमेलमै जाने व्यवस्था, अनलाइन कागजात प्रमाणीकरण, अनलाइन आवेदन प्रणाली, अनलाइन बिमा र कल्याणकारी कोषको रकम भुक्तानी, अनलाइन पूर्वस्विकृति, अनलाइन छनोट सूची प्रकाशन र अनलाइन अन्तिम श्रम स्विकृतिको व्यवस्था गरिसकिएको महानिर्देशक डा.भुषालले बताए ।
