काठमाडौं (प्रस)– सरकारले वैदेशिक रोजगारीको नाममा प्रलोभन देखाएर ठगी गरेको पाइए कडा कारबाही गर्ने चेतावनी दिएको छ । श्रम, रोजगार तथा सामाजिक सुरक्षा मन्त्रालयले नीतिगत, कानुनी र प्रक्रियागत व्यवस्थाको बर्खिलाप हुनेगरी कोही कसैले वैदेशिक रोजगारीमा जान चाहने नेपाली नागरिकहरुलाई ठगी गरेको पाइएमा कठोरतापूर्वक कानुनी कारबाही गर्ने चेतावनी दिएको हो ।
मन्त्रालयले आइतबार एक विज्ञप्ति जारी गर्दै पछिल्लो समय व्यक्तिगत तथा संस्थागत रुपमा वैदेशिक रोजगारीमा जान चाहने नेपाली नागरिकहरुलाई विभिन्न व्यक्ति तथा संस्थाबाट अनेक प्रकारका प्रलोभन देखाइ ठगी गर्ने गरेको उजुरी तथा गुनासा आउने गरेको जनाएको छ । यस्ता विषयमा मन्त्रालयको गम्भीर ध्यानाकर्षण भएको उल्लेख गरिएको छ ।
‘वैदेशिक रोजगारीको सिलसिलामा देशभित्र मात्र नभई विदेशमासमेत नेपालीले नेपालीलाई र रोजगारदाताले नेपाली श्रमिकलाई ठगी गर्ने गरेको विषयमासमेत मन्त्रालयमा गुनासो तथा उजुरीहरु आएको अवस्था विद्यमान छ,’ विज्ञप्तिमा भनिएको छ । मन्त्रालयले म्यानपावर व्यवसायीहरुलाई पनि कानुनी एवं नीतिगत व्यवस्थाको परिपालना गर्न सचेत गराएको छ । ‘वैदेशिक रोजगारीमा पठाउन इजाजतप्राप्त व्यवसायीहरुबाट समेत कानुनी एवं नीतिगत व्यवस्थाको परिपालना गरी पेसागत इमान्दारिताका साथ काम गर्नुहुनसमेत मन्त्रालय हार्दिक अनुरोध गर्दछ,’ मन्त्रालयले भनेको छ ।
यस्तै व्यक्तिगत श्रम स्वीकृतिमार्फत वैदेशिक रोजगारीमा जान चाहने नागरिकहरुले सरकारी राजस्वबाहेक कुनै पनि व्यक्ति वा संस्थालाई कुनै पनि प्रकारको शुल्क बुझाउनु नपर्ने मन्त्रालयले जनाएको छ । यदि व्यक्तिगत श्रम स्वीकृतिमा जान चाहने श्रमिकहरुलाई कोही कसैले भ्रम वा दबाबमा पारी ठगी गर्ने उद्देश्यले गैरकानुनी रकम माग गरेको अवस्थामा नेपाल सरकारका सम्बन्धित निकायमा जानकारी गराउन मन्त्रालयले आग्रहसमेत गरेको छ । यसैगरी संस्थागत श्रम स्वीकृतिमा वैदेशिक रोजगारीमा जान चाहने युवा जनशक्तिलाई आफूले जान खोजेको मुलुक, कामको प्रकृति, आफूसँग भएको सीप, रोजगारदाताले उपलब्ध गराउने सेवा सर्त राम्रोसँग अध्ययन गरेरमात्रै प्रक्रिया अघि बढाउन विज्ञप्तिमार्फत सुझाइएको छ ।
विदेश जाने जनशक्तिले वैदेशिक रोजगारीमा हुने सेवासुविधा एवं लाग्ने शुल्क र आफूलाई पठाउने म्यानपावर कम्पनीको विषयमा पूर्णरुपमा जानकारी लिएर मात्र प्रक्रिया थालनी गर्नुपर्ने मन्त्रालयका सहसचिव एवं प्रवक्ता डण्डुराज घिमिरेले बताए । मन्त्रालयमा विदेश पठाउँदा गैरकानुनी एवं अनधिकृतरुपमा रकम असुल्ने गरेको उजुरी तथा गुनासो अधिक आउने गरेको भन्दै प्रवक्ता घिमिरेले कुनै पनि शुल्क बुझाउँदा व्यक्तिलाई नभई संस्था (म्यानपावर कम्पनी)लाई बुझाउन र बुझाएको प्रमाण अनिवार्यरुपमा लिन सम्बद्ध सबैलाई पटक–पटक सूचित गरिरहेको जानकारी दिए ।
मन्त्रालयले पछिल्लोसमय स्वदेशभित्र नै प्रशस्त रोजगारीका अवसरहरु सिर्जना गर्ने र श्रम बजारमा प्रवेश गर्ने युवा जनशक्तिलाई रोजगारीको प्रत्याभूति दिनेसम्बन्धमा प्राथमिकताका साथ काम गरिरहेको उल्लेख गरेको छ । यद्यपि, श्रम बजारमा आपूर्ति भइरहेका जनशक्तिलाई आन्तरिक रोजगारी मात्रै पर्याप्त नहुने बताउँदै वैदेशिक रोजगारी बाध्यात्मक अस्थायी विकल्पको रुपमा रहेको जनाएको छ । वैदेशिक रोजगारीलाई व्यवस्थित, सुरक्षित र मर्यादित बनाउन मन्त्रालयले विभिन्न नीतिगत, संस्थागत तथा प्रक्रियागत सुधारका लागि गृहकार्य गरिरहेको जानकारी दिएको छ ।
