काठमाडौं– श्रम, रोजगार तथा समाजिक सुरक्षामन्त्री डोलप्रसाद अर्यालले जिम्मेवारी सम्हालेको १९ दिनमा नै पदबाट राजीनामा दिएका छन् । श्रममन्त्रीमा नियुक्त हुँदादेखि नै विवादमा फसेका उनी अन्ततः उनको दल राष्ट्रिय स्वतन्त्र पार्टी (रास्वपा)का सभापति रवि लामिछाने र प्रधानमन्त्री पुष्पकमल दाहालबीचको टकरावका कारण राजीनामा दिने अवस्थामा पुगेका हुन् ।
प्रधानमन्त्री दाहालले लामिछानेलाई पुनः गृहमन्त्री बनाउन अस्वीकार गरेपछि रास्वपाले सरकारबाट बाहिरिने निर्णय गरेको हो । पार्टीको निर्णयबमोजिम श्रममन्त्री अर्यालसहित रास्वपाबाट मन्त्री बनेकाहरुले आइतबार साँझ प्रधानमन्त्रीसमक्ष राजीनामा बुझाएका हुन् ।
अर्याल माघ ३ गते श्रममन्त्री नियुक्त भएका थिए । उनको नियुक्तिसँगै वैदेशिक रोजगार व्यवसायीलाई मन्त्री बनाएको भन्दै रास्वपाको चर्को आलोचना भएको थियो । स्वार्थ बाझिने मन्त्रालय लिएको भन्दै उनको आलोचना भएको हो । तर, अर्यालले आफू म्यानपावरमा आबद्ध भएको प्रमाणित गर्न सञ्चारमाध्यमलाई चुनौती दिएका थिए । उनी नयाँ बानेश्वरस्थित सृष्टि ओभरसिज इम्प्लोयमेन्ट सर्भिस प्रालिका अन्तर्राष्ट्रिय बजार निर्देशक रहेको खुलासा भएको थियो । अर्याल म्यानपावर व्यवसायी भएको सार्वजनिक हुनासाथ उक्त म्यानपावरको वेबसाइट नै नखुल्ने बनाइएको थियो । यतिमात्र नभई उनी रेमिट्यान्स तथा ट्राभल एजेन्सी सञ्चालक भएको पनि खुलेको थियो ।
म्यानपावर व्यवसाय र वैदेशिक रोजगारको क्षेत्रलाई नियमन गर्ने मन्त्रालयको नेतृत्वमा म्यानपावर कम्पनीसँग जोडिएका व्यवसायी पुगेपछि स्वार्थ बाझिएको भन्दै विवादित भए । मन्त्रालयको नेतृत्व सम्हालेलगत्तै वैदेशिक रोजगारीको बाध्यकारी अवस्था अन्त्य गर्छु भनेका अर्यालले त्यसको दुई दिनमा नै ‘रोजगार व्यवसायीलाई फाइदा हुनेगरी काम गर्छु’ भन्ने विवादित अभिव्यक्ति दिए । साथै, ‘फ्रि भिसा, फ्रि टिकट’ कार्यान्वयनमा नगई पुनरवलोकन गर्ने अभिव्यक्ति दिएर कामदारको थाप्लोमा आर्थिक भार थोपर्ने विवादित नीति अख्तियार गर्ने तयारी गर्दै थिए ।
यसबीचमा थुप्रै नीतिगत विवाद हुने कार्य गर्ने तयारी गरिरहेको मन्त्रालयकै उच्च अधिकारीहरुको भनाइ छ । यद्यपि, उनले कसैलाई पनि कुनै काममा दबाब नदिएको दाबी गर्दै आएका थिए । पछिल्लो समय पार्टीमा देखिएको अन्तरिक समस्याले पनि उनलाई विवादमा तान्यो । पार्टी सभापति लामिछानेले सर्वोच्च अदालतको फैसलाअनुरुप सांसद, संसदीय दलको नेता, उपप्रधान तथा गृहमन्त्रीको पद गुमाएपछि अर्याललाई संसदीय दलको नेता बनाइयो । यसमा पनि उनी विवादमा परे । संसदीय दलमा उपनेता रहेका विराजभक्त श्रेष्ठलाई पन्छाउँदै अर्याल संसदीय दलको नेता बने । यही आन्तरिक विवादकाबीच मन्त्रालयको जिम्मेवारी सम्हालिरहेका अर्यालले पार्टीको निर्णयका आधारमा राजीनामा गरे ।
प्रकाशित मिति: सोमबार, माघ २३, २०७९ १३:४३
-1745656903.jpeg)