काठमाडौं– कतारको मर्करी मिना कम्पनीमा काम गरी बिनातलब सन् २०१७ मा फर्कन बाध्य भएका ३४ नेपाली कामदारलाई करिब ९० लाख रूपैयाँ नेपालस्थित कतारी राजदूताबासमार्फत दिलाइने वैदेशिक रोजगार विभागका महानिर्देशक डा.भीष्मकुमार भुषालले जानकारी गराएका छन् । सन् २०१७ को अन्त्यमा कम्तिमा ३४ जना नेपाली आप्रवासी श्रमिकहरू कतारबाट खाली हात, निरासा र ऋणको ठूलो भारीका साथ नेपाल फर्किएका थिए ।
मध्यपूर्व र उत्तर अफ्रिकाभर यान्त्रिक (मेकानिकल), इन्जिनियरिङ र प्लम्बिङ क्षेत्रमा कार्य गर्ने अग्रणी कम्पनी मर्करी मिनामा कार्यरत उनीहरूले सन् २०२२ को फिफा विश्वकपका लागि तयार गरिन लागेको भौतिक संरचना निर्माण परियोजनामा तलब वा आवश्यक कानुनी कागजातबिना नै महिनौँसम्म काम गर्नु परेको थियो । भुक्तानी पाउनु पर्ने तलब र सुविधाबापतको रकम प्रतिश्रमिक सरदर दुई लाख रूपैयाँभन्दा बढी पुगिसक्दा पनि कतारको अव्यवहारिक स्पोन्सरसिप प्रणाली ‘कफाला’ का कारण उनीहरू अप्ठ्यारोमा मात्रै परेनन्, उनीहरूलाई त्यस्तो अवस्थामा परेको बेलामा कतैबाट पनि खासै सहायता पाएका थिएनन् ।
खाना वा तलबसमेत नपाई अप्ठ्यारोमा परेपश्चात विभिन्न निकायमा सहायताका लागि प्रयास गरेका थिए । तर, मद्दतका लागि उनीहरूले गरेको अनुरोधलाई स्वदेश एवं विदेशमा रहेका सहयोगी संस्थाहरूले सहायता सुनिश्चित गर्न विफल रहेको पीडितहरूको गुनासो थियो ।
डिसेम्बर २०१६ देखि मर्करी मिनाले उनीहरूलाई तलब दिन छाड्यो, केही समयका लागि मात्रै तलब भुक्तानीमा ढिलाइ भएको र यो समस्या चाँडै नै समाधान हुने भनी वाचा गरेका कारण उनीहरूले कामलाई निरन्तरता दिए । तर, त्यो समस्या पाँच महिनासम्म पनि समाधान भएको थिएन । कतारबाट फर्केको झन्डै ३ वर्ष बितिसक्दा पनि आफूहरूले पाउन बाँकी तलब सुविधा कसैले पनि आजसम्म पाएका छैनन् । महानिर्देशक डा.भुषालका अनुसार अब भने समस्या समाधान भएको छ ।
