काठमाडौं– वैदेशिक रोजगार विभागमा सूचीकृत भएका ५३ जना मेलमिलापकर्तालाई शपथग्रहण गराइएको छ । वैदेशिक रोजगार सम्बन्धी उजुरीहरू सजिलै फरफराक गर्ने उद्देश्यले सरकारका उच्च अधिकारीहरूको उपस्थितिमा विभागमा सूचीकृत भएका ५३ जना मेलमिलापकर्ताहरूलाई विभागका महानिर्देशक डा.भीष्मकुमार भुषाले सोमबार शपथग्रहण गराएका हुन् ।
शपथग्रहण कार्यक्रममा सर्वोच्च अदालतका न्यायाधीश ईश्वरप्रसाद खतिवडा, वैदेशिक रोजगार न्यायाधीकरणका अध्यक्ष रमेशकुमार खत्री, महान्यायाधिवक्ताको कार्यालयका नायब महान्यायाधिवक्ता पद्मप्रसाद पाण्डे, नेपाल बार एसोसिएसनका महासचिव लिलामणि पौडेल, सर्वोच्च अदालतका रजिष्ट्रार नारायण पन्थी र विभागका कर्मचारीहरू उपस्थिति रहेको थियो ।
कार्यक्रममा बोल्दै सर्वोच्च अदालतका न्यायाधीश खतिवडाले विभागमा दर्ता भएका सबै विवादहरूलाई मेलमिलाप प्रक्रियामा लैजान नसकिए पनि करिब ७५ प्रतिशत विवाद मेलमिलापको माध्यमबाट मिलाइन सकिने अनुमान गरेका छन् । त्यस्तै विभागका महानिर्देशक डा.भुषालले पनि मेलमिलापको माध्यमबाट पहिलेभन्दा धेरैभन्दा धेरै ठगी कम हुनको साथै पीडितले पनि मेलमिलापकर्ताको माध्यमबाट छिटो न्याय पाउने विश्वास व्यक्त गरेका छन् ।
त्यति मात्र होइन विभागमा शपथग्रहण कार्यक्रमसँगै मेलमिलाप कक्षको समेत व्यवस्था गरिएको छ । मेलमिलाप कक्षको उद्घाटन सर्वोच्च अदालतका न्यायाधीश खतिवडाले गरेका हुन् । त्यसैले अब विभागले वैदेशिक रोजगारी सम्बन्धी उजुरी फरफराकमा तेस्रो निष्पक्ष व्यक्तिको सहयोग लिन सक्ने महानिर्देशक डा. भुषालले बताएका छन् । व्यक्तिगत उजुरी न्यायाधीकरणमा पठाउँदा प्रक्रिया लामो हुने र धेरै समय लाग्ने भएकाले उजुरीकर्ता र दोषी दुवै पक्षले सूचीकृत भएकामध्ये आफूलाई मन पर्ने कुनै एउटा मेलमिलापकर्ताबाट उजुरीको फरफारक गर्न सक्ने उनले बताए ।
