दोहा– कतारका लागि नेपाली राजदूत डा. नारदनाथ भारद्वाजले कतारको विकास निर्माणमा नेपाली कामदारको ठूलो योगदान रहेको बताएका छन् । दूताबासले आयोजना गरेको श्रमिक सचेतना तथा सूचनामूलक अन्तरक्रियात्मक कार्यक्रममा उनले यस्तो बताएका हुन् ।
कतार सरकारका उच्च अधिकारीहरूसँगको भेटमा उनीहरूले नेपाली नागरिकहरू प्रशंसा र कदरका पात्र रहेको तथा कतारको निर्माण र विकासमा महत्वपूर्ण योगदान पु¥याएको कुरा आफूलाई बताएको राजदूत भारद्वाजले जानकारी दिए ।
वैदेशिक रोजगारीमा रहेका नेपालीहरूले रगत र पसिना बगाएर पठाएको रेमिट्यान्सले नेपालको अर्थतन्त्रमा महत्वपूर्ण योगदान पु¥याएको बताउँदै वैधानिक तवरले नेपालमा पैसा पठाउनका लागि आग्रहसमेत राजदूत भारद्वाजले गरेका थिए ।
कतारको फ्याकल्टी म्यानेजमेन्ट तथा मेन्टिनेन्स कम्पनी र उडल्यान्ड ट्रेडिङ तथा कन्ट्रयाक्टिङ कम्पनीमा कार्यरत नेपालीहरूको उपस्थिति रहेको उक्त कार्यक्रममा कतारमा वैदेशिक रोजगारीका सिलसिलामा गर्न हुने र गर्न नहुने कामहरू, कतारको कानुन र राजदूताबासले दिने श्रमसँग जोडिएर आउने सेवा र सुविधा तथा राहदानी तथा कन्सुलर सेवाका बारेमा जानकारी गराइएको दूताबासले जनाएको छ ।
कार्यक्रममा राजदूत भारद्वाजले उपस्थित सबैलाई श्रमिकका हक हितका लागि दूताबासले चालेका पहलकदमीहरूको बारेमा जानकारी गराएका थिए । कार्यक्रममा श्रम सम्बन्धि विषयहरू तथा कतारमा नेपाली कामदारले भोग्नु परेका विभिन्न प्रकारका समस्याहरू र त्यस प्रकारका समस्या आउन नदिने सचेतनाका उपायहरूका बारेमा श्रम काउन्सिलर शिवराम पोखरेल र श्रम सहचारी नरेन्द्रराज ज्ञवाली, राहदानी ट्राभल डकुमेन्ट तथा व्यक्तिगत माग प्रमाणिकरण बारेमा द्वितीय सचिव ऋचा भट्टराई तथा विभिन्न प्रकारका कन्सुलर सम्बन्धी विषयमा द्वितीय सचिव भुवनप्रसाद भट्टले जानकारी दिएका थिए ।
कार्यक्रममा उपनियोग प्रमुख लक्ष्मण खनालले स्वागत मन्तव्य राखेका थिए भने द्वितीय सचिव प्रवीण भट्टराईले कार्यक्रमको सञ्चालन गरेका थिए । कतारमा वैदेशिक रोजगारीको सिलसिलामा रहेका नेपाली नागरिकहरूले कतारको विद्यमान कानुन, धर्म, परम्परा र संस्कृति तथा रोजगारदाता कम्पनीसँग भएको करारनामाका प्रावधानहरूको बारेमा आवश्यक जानकारी उपलब्ध गराउन तथा कुनै कारणवश केही समस्या आएमा के कसरी समाधान गर्ने भनेर नेपाली दूताबासले समय समयमा सचेतना तथा सूचनामूलक अन्तरक्रियात्मक कार्यक्रम गर्दै आएको दूताबासले जनाएको छ ।
-1745656903.jpeg)