काठमाडौं– रोजगार अनुमति प्रणाली (इपिएस) अन्तर्गत कोरियाको सीप र योग्यता पास गरेका युवाहरूको आगामी १५ माघदेखि स्वास्थ्य परीक्षण र १९ माघदेखि रोजगार आवेदन फारम भरिने भएको छ । सन् २०१९ मा उत्पादनमूलक, कृषि तथा पशुपालनतर्फ उत्तीर्ण भएका ६ हजार ९ सय ८ जना युवाहरूले रोजगारदाताको छनोटका लागि रोस्टर तयार गर्न स्वास्थ्य परीक्षण र रोजगार आवेदन भरिने भएको हो ।
उत्तीर्णहरूको १५ माघदेखि ७ दिनसम्म लगातार राजधानीको ४ वटा अस्पतालमा स्वास्थ्य परीक्षण गरिने इपिएस कार्यालय ग्वार्कोले सूचना जारी गर्दै जनाएको छ । त्यस्तै, कार्यालयले रोजगारी आवेदनका लागि पनि १९ माघदेखि लगातार ८ दिनको समय निर्धारण गरेको छ ।
इपिएस कार्यालयले जारी गरेको सूचनाअनुसार स्वास्थ्य परीक्षणका लागि शुक्रराज ट्रपिकल अस्पताल टेकु, निजामती कर्मचारी अस्पताल मिनभवन, पाटन अस्पताल लगनखेल र कोरिया मैत्री–नेपाल अस्पाताल ठिमीमा आफ्नो सिम्बोल नम्बर अनुसारको नामावली अनुसार गर्न सकिने छ । स्वास्थ्य परीक्षण गर्नका लागि उत्तीर्ण भएको युवाहरूले दरखास्त फाराम भर्दा पेस गरेको राहदानीको सक्कल प्रति, इपिएस टपिक परीक्षाको प्रवेशपत्र, हालसालै खिचिएको पासपोर्ट साइजको फोटो २ प्रति र स्वास्थ्य परीक्षण शुल्कबापत ५५.६४ अमेरिकन डलर बराबर हुन आउने नेपाली रकम लिएर जानुपर्ने कार्यालयले जनाएको छ ।
त्यस्तै, रोजगार आवेदन फारम भर्नका लागि एमआरपी राहदानीको अनुहार प्रष्ट देखिने गरी रंगिन प्रतिलिपि १ प्रति (राहदानीको बहाल अवधि कम्तीमा एक वर्ष रहेको), स्वास्थ्य परीक्षण प्रमाणपत्रको सक्कली प्रति, प्रहरी प्रतिवेदनको सक्कली प्रति, आवेदन फारामबापत शुल्क तिरेको बैंकको बैंक भौचर सक्कल, ३ महिना यता खिचेको दुवै कान देखिने एमआरपी साइजको सेतो पृष्ठभूमि भएको, अप्पर चेस्ट देखिने, सेतो कपडा नलगाएको अनुहार प्रष्ट देखिने पासपोर्ट साइजको रंगिन फोटो एक प्रति लिएर बिहान ९ बजेदेखि बेलुका ५ बजेसम्म स्वयं उपस्थित भएर भर्नु पर्र्ने कार्यालयले जनाएको छ ।
त्यसैगरी, कोरियन परीक्षा उत्तीर्ण गर्नु कोरियामा रोजगारीको ग्यारेन्टी नभएकाले उत्तीर्ण भएपछि पनि कोरियाको रोजगारदाताको छनोटमा नपरेको अवस्थामा रोजगारीको ग्यारेन्टी नहुने हुँदा आफूले गरिरहको पेसा, व्यवसाय आदिलाई नियमित गर्न कार्यलयले सूचनामार्फत सुझाव दिएको छ ।
प्रकाशित मिति: सोमबार, माघ १३, २०७६ ०५:४५
-1745656903.jpeg)