धनगढी– सुदूरपश्चिम प्रदेशबाट एक वर्षको अवधिमा १५ हजार युवाहरूले पुनः श्रम स्विकृति लिई वैदेशिक रोजगारीका लागि विदेश गएका छन् । नेपाल सरकारले ११ माघ ०७५ देखि वैदेशिक रोजगारीबाट बिदामा नेपाल फर्किएका सुदूरपश्चिम प्रदेशका युवाहरूहरूलाई पुनः श्रम स्विकृति प्रदेशबाटै दिने व्यवस्था नेपाल सरकारले गरेको थियो ।
श्रम कार्यालय धनगढीको तथ्यांकबमोजिम आर्थिक वर्ष ०७५÷७६ को पाँच महिनाको अवधिमा एक हजार पाँच सयभन्दा बढी जनाले पुनः श्रम स्विकृति लिइएका थिए । त्यसैगरी चालु आर्थिक वर्ष ०७६÷७७ मा ४ हजार ७ सय ९० जनाले पुनः श्रम स्विकृति लिइएका छन् ।
सोही व्यवस्थाअनुसार श्रम कार्यालय धनगढीबाट पुनः श्रम स्विकृति लिने युवाहरूको संख्यामा वृद्धि भएको कार्यालय प्रमुख कृष्णानन्द जोशीले बताएका छन् । कार्यालय प्रमुख जोशीका अनुसार नेपाल सरकारले माघ ०७५ मा सातै प्रदेशमा वैदेशिक रोजगार कार्यालय स्थापना गरेसँगै सुदूरपश्चिम प्रदेशबाट पुनः श्रम स्विकृति लिने सेवाग्रहीहरूको भीड हुने गरेको छ ।
उनका अनुसार सुदूरपश्चिम प्रदेशमा श्रम स्विकृति लिन सजिलो भए पनि वैदेशिक रोजगारीका नाममा ठगिएका निवेदनहरू दर्ता हुने गरेको छ । कारबाहीका लागि जिल्ला प्रशासन कार्यालयबाट अघि बढ्ने र दण्ड सजाय, जरिवाना, थुनामा राख्ने अधिकार भने वैदेशिक रोजगार विभागलाई नै रहेको उनले बताए । आर्थिक वर्ष ०७५÷७६ मा सुदूरपश्चिम प्रदेशबाट ३ हजार २ सय ७६ जना पुरुष र महिलाले पुनः श्रम स्विकृति लिएका छन् । माघ ०७५ देखि ०७६ पुस मसान्तसम्म यस प्रदेशबाट ३ हजार २ सय ७६ जनाले वैदेशिक रोजगारका लागि पुनः श्रम स्विकृति लिई वैदेशिक रोजगारमा गएको श्रम कार्यालय धनगढीले जनाएको छ ।
सुदूरपश्चिम प्रदेशबाट वैदेशिक रोजगारमा जाने जिल्लाका युवाहरूको तथ्यांकमा सुदूरपश्चिम प्रदेशका नौ जिल्लाहरूमध्यै सबैभन्दा बढी वैदेशिक रोजागरमा जाने युवाहरूको संख्या कञ्चनपुरको रहेका छन् । पुनः श्रम स्विकृति लिने पुरुष १ हजार २ सय १७ र महिला १७ जना गरी १ हजार २ सय ३४ जना रहेका छन् । त्यसैगरी कैलालीबाट ९ सय १६ पुरुष र १८ जना महिला गरी ९ सय ३४ जना, बैतडीबाट ३ सय ९ जना, डडेलधुराबाट १ सय ८८ जना, डोटीबाट १ सय ५६ जना, दार्चुलाबाट १ सय ३३ जना, बझाङबाट ८२ जना बाजुराबाट ४२ जना र अन्य ९७ जना गरी सुदूरपश्चिम प्रदेशबाट ३ हजार २ सय ७६ जनाले पुनः श्रम स्विकृति लिएको कार्यालयका प्रमुख जोशीले बताए ।
सुदूरपश्चिम प्रदेशबाट कुन देशमा कति गए ?
यस प्रदेशबाट विभिन्न देशमा जाने युवाहरूको संख्या सबैभन्दा बढी युएईका लागि पुनः श्रम स्विकृति लिएका छन् । युएईका लागि ११ सय ३ पुरुष १८ जना महिला गरी ११ सय २१ जनाले पुनः श्रम स्विकृति लिएको कार्यालयको तथ्यांकमा उल्लेख छ । त्यसैगरी साउदीका लागि ६ सय ९२ जना, मलेसिया ६ सय ५९ जना, कतार ५ सय ६९ जना, कुवेतका लागि १ सय २१ जना अन्य देश १ सय १४ गरी ३ हजार २ सय ७६ जनाले पुनः श्रम स्विकृति लिएको कार्यालयको तथ्यांकमा छ ।
