काठमाडौं- प्रधानमन्त्री पुष्पकमल दाहालले विदेशमा रहेका लाखौं नेपालीको मन जित्ने गरी काम गर्ने प्रतिबद्धता व्यक्त गरेका छन् । उनले आफ्नो दोस्रो कार्यकालसम्म गैरआवासीय नेपाली संघ (एनआरएनए)ले उठाएका मागहरू सम्बोधनका लागि प्रयास गरेको भन्दै र अब तेस्रो कार्यकाल विदेशमा बस्ने बहुसंख्यक नेपालीको मन जित्ने प्रतिबद्धता व्यक्त गरे ।
प्रधानमन्त्रीनिवास बालुवाटारमा सोमबार एनआरएनएका प्रतिनिधिहरुसँगको छलफलमा प्रधानमन्त्री दाहालले उक्त कुरा बताएका हुन् । भेटमा प्रधानमन्त्री दाहालले नेपालमा विद्यमान कतिपय कानुनी प्रावधानले सिर्जना गरेका अप्ठ्यारालाई नेपाल सरकारले क्रमशः सच्याउँदै आएको र अबका दिनमा पनि कानुनी उल्झनलाई पन्छाउने प्रयास आफ्नो तर्फबाट जारी रहने बताए ।
विदेशमा रहेका नेपालीले नेपाल र नेपालीको पहिचान विश्वमाझ पुर्याउन ठूलो भूमिका निर्वाह गरेको भन्दै गैरआवासीय नेपालीप्रति प्रधानमन्त्री प्रचण्डले आभार व्यक्त गरे । राजनीतिक, आर्थिक, सांस्कृतिक र सामाजिकरूपमा विश्वभर नेपाललाई चिनाउन नेपालीहरू थप संवेदनशील र जिम्मेवार बन्दै गएकोप्रति प्रधानमन्त्री दाहालले खुसी व्यक्त गरेको उनको सचिवालयले जनाएको छ ।
भेटका क्रममा एनआरएनएकी कार्यकारी अध्यक्ष रविना थापाले हालसम्म संघले गरिआएको काम, नेपाल सरकारका तर्फबाट सम्बोधन भइआएका विषय र आगामी दिनमा सरकारले गर्नुपर्ने नीतिगत र कानुनी सुधार सम्बन्धमा आफ्नो भनाइ राखेकी थिइन् । संघका अध्यक्ष बद्री केसीले नेपाल सरकारसहितको लगानी रहेको १० अर्ब रुपैयाँको लगानी कोष ‘एनआरएन नेपाल डेभलप्मेन्ट फन्ड’लाई अघि बढाउन देखापरेका कानुनी र व्यावहारिक कठिनाइबारे जानकारी गराउँदै ती कठिनाइलाई तत्काल सम्बोधन गर्न आग्रह गरे ।
उनले विदेशमा रहेका बहुसंख्यक नेपालीलाई सामाजिक सुरक्षा कोषमा जोड्नुपर्ने, विदेशमा कामका सिलसिलामा अंगभंग भएका नेपालीलाई स्वदेश फिर्ता गर्नका साथै उनीहरूका परिवारलाई आर्थिक सहायतासहित पुनः एकीकरणलगायतका विषयमा नेपाल सरकारले पहल कदमी लिनुपर्ने माग गरे ।
अर्का अध्यक्ष कुल आचार्यले संघले उठाएको गैरआवासीय नेपाली नागरिकताको मुद्दालाई तत्काल सम्बोधन गर्न अनुरोध गर्दै ‘एक पटकको नेपाली सदैव नेपाली’ हुने भन्ने कुरा अन्योलमा परेको भन्दै नागरिकताको विषयलाई यथाशक्य छिटो टुंगोमा पुर्याउन आग्रह गरे ।
